Read Rampi Wahiu 22 Bible Online

Wahiu 22 - Rampi bible

Wahiu 22

¹Malaꞌeka tiꞌo mampatidoꞌkiꞌa woꞌo uwai to moꞌinoto. Uwai tiꞌo hibali watu kaca, hei to mepaꞌani kotuwuꞌ. Uluꞌna mesuwu ka pahura kodatuana Pueꞌ Ala hante hi Yesu to nipandiriꞌ hibali Anaꞌ Gimba,

²hei moꞌili i lumbu lala ngkodeꞌ i kota tiꞌo. Momehanupe bota uwai tiꞌo, nokotuwuꞌi loti to nikokeneꞌi Loti to Mepaꞌani Kotuwuꞌ to hawaꞌi Mokoꞌukoa. Loti tiꞌo mowuaꞌ hampuluꞌ rompiha i lalina hantoꞌa, i wula-wulana mowuaꞌ, hei taweꞌna nipakeꞌ mampokoꞌoriꞌ toaꞌ i humanele duniaꞌ.

³I lali kota tiꞌo hamboaꞌmo uwaꞌ to ropobuntoꞌ. Pahura kodatuana Pueꞌ Ala hei Anaꞌ Gimba uwaꞌ i lali kota tiꞌo, hei rumbaꞌaNa hingkiꞌ menombahi pe Io.

⁴Iohi hingkiꞌ pangkiꞌhi lioNa. Konaꞌna Pueꞌ Ala hingkiꞌ teꞌukiꞌ i rouꞌra.

⁵Hamboaꞌmo hingkiꞌ uwaꞌ wini, hei toaꞌ to meꞌohaꞌ itoꞌo hamboaꞌmohi moparaluꞌi huluꞌ ba wanta ando, alaꞌ Pueꞌ Ala hadoduoNa to hingkiꞌ mowantaihi, hei toaꞌNa hingkiꞌ moparentahi hibali datu wute nantolou-louna.

⁶Uko tiꞌo, notiꞌikiꞌa malaꞌeka tiꞌo, “Lekiꞌ-lekiꞌna lolita to ihorimo, bateꞌna tuꞌu hei bateꞌna hingkiꞌ mewali. Pueꞌ Ala to mepaꞌani InohaꞌNa pe lekiꞌ-lekiꞌna nabiNa, Iomo to morumbaꞌ malaꞌekaNa humei mamponobuhoꞌi rumbaꞌaNa hapo to hangangaa hohiꞌ hingkiꞌ mewali.”

⁷Notiꞌi Pueꞌ Yesu, “Hamboaꞌmo morue hingkiꞌ hupaꞌA! Motanaꞌhi toaꞌ to mampetuntui poturuꞌ to teꞌukiꞌ i lali suraꞌ hieꞌe noniuꞌ hapo to hingkiꞌ mewali.”

⁸Lekiꞌ-lekiꞌna to notidoꞌkiꞌa malaꞌeka tiꞌo, akumo hi Yohanes to pahori hei pangkiꞌ mata. Kokuhorina hei kokuꞌokiꞌna tiꞌo, melingkotuꞌa i kapuꞌna, menomba pe io,

⁹angkana noꞌopiꞌa malaꞌeka tiꞌo, notiꞌi, “Inioꞌ! Anioꞌko menomba pe aku, alaꞌ aku woꞌo rumbaꞌana Pueꞌ Ala, hibali hante ingko hei hangko nabimu hei lekiꞌ-lekiꞌna toaꞌ to mampetuntui hapo to teꞌukiꞌ i lali suraꞌ hieꞌe. Bateꞌnalu Pueꞌ Ala to masipatoꞌ ipenombai.”

¹⁰Hei notiꞌikiꞌa womo, “Inioꞌ iwowuniꞌi hapo to teꞌukiꞌ i lali suraꞌ hieꞌe noniuꞌ hapo to hingkiꞌ mewali, alaꞌ dodungkumo tempone lekiꞌ-lekiꞌna hieꞌe hingkiꞌ mewali.

¹¹Toaꞌ to mowali to kodake, desiluiae mowali nturusi hapo to kodake. Toaꞌ to mowali hapo to mekokomaꞌi, desiluiae mowali nturusi hapo to mekokomaꞌi. Toaꞌ to mowalia to mononto, desiluiae mowalia nturusi hapo to mononto. Toaꞌ to mengkoruꞌ pe Pueꞌ, desiluiae mengkoruꞌ nturusi pe Pueꞌ.”

¹²Notiꞌi Pueꞌ Yesu, “Hamboaꞌmo morue hingkiꞌ hupaꞌA, hei hingkiꞌ Kuhowoni waliare lekiꞌ-lekiꞌna toaꞌ hintotoꞌ hante hapo to rowali.

¹³Akumo hieꞌe Alpa hei Omega. Akumo to Uluꞌ-uluꞌna hei to Koꞌukoana. Akumo Pepongkana hei koukoana.

¹⁴Motanaꞌhi toaꞌ to mowaheꞌ jubara wute moꞌituꞌ, alaꞌ iohi to mekahi pe lali kota tiꞌo moliu wambaꞌ hei masipatoꞌ mangka wuaꞌ ka Loti to Mepaꞌani Kotuwuꞌ.

¹⁵Angkana toaꞌ to kodake, topedoti, to mowali walia to mekokomaꞌi, to merorokoꞌ, topenomba pe lentena lomoa, topowuti, hei toaꞌ to mampotanaꞌ powutira, hawaꞌhi nopoliu mekahi pe lali kota tiꞌo. Angkana i howaliluhi.

¹⁶ Akumo hi Yesu to morumbaꞌ malaꞌekangKu mampowute poturuꞌKu hieꞌe pe jumaꞌa-jumaꞌa. Akumo hieꞌe muleꞌna datu Daudi. Akumo Betueꞌ Tinaꞌ i Motoꞌando to mewanta mpololeke.”

¹⁷Inohaꞌ Mangkolehi hante towoweꞌe to hingkiꞌ nipohamoko tiꞌo mantiꞌi, “Humeimokei!” Hei lekiꞌ-lekiꞌna toaꞌ to pahori lolita hieꞌe hingkiꞌ mantiꞌi woꞌo, “Humeimokei!” Hihimo to mangkumaro, humeimokei! Hei himo to dokoꞌ maꞌinu, humeimo maꞌinu uwai to mampoꞌuwaꞌ kotuwuꞌ. Hawaꞌi paralu ihilikei!

¹⁸Kupowute pe lekiꞌ-lekiꞌna toaꞌ to mampehoromua hapo to kuꞌukiꞌ i lali suraꞌ hieꞌe: ane uwaꞌ toaꞌ to motambai ohina suraꞌ hieꞌe, Pueꞌ Ala hingkiꞌ motambai woꞌo pehukuna pe toaꞌ tiꞌo: hingkiꞌ pahuahi kohorewuꞌ hintotoꞌ hante hapo to teꞌukiꞌ i lali suraꞌ hieꞌe.

¹⁹Hei ane uwaꞌ toaꞌ to mokuraꞌi ohina ka suraꞌ hieꞌe, Pueꞌ Ala hingkiꞌ mokuraꞌi woꞌo dolaꞌna: hamboaꞌmohi wadi mangka wuaꞌ ka Loti to Mepaꞌani Kotuwuꞌ, hei hawaꞌhi wadi mekahi i lali kota to mangkolehi, hibali to teꞌukiꞌ i lali suraꞌ hieꞌe.

²⁰Hi Yesu hadoduona to mosobiꞌi lekiꞌ-lekiꞌna to kuꞌukiꞌ hieꞌe, hei Notiꞌi, “Tuꞌu mpololeke. Hamboaꞌmo morue, hingkiꞌ hupaꞌA.” Amin! HumeimoKo, Pueꞌ Yesu!

²¹Mekokaeꞌa hingkeꞌna Pueꞌ Yesu mobarakati lekiꞌ-lekiꞌna toaꞌna Pueꞌ Ala ka kopopuhiꞌna laliNa. Amin.