Read Rampi Wahiu 3 Bible Online

Wahiu 3 - Rampi bible

Wahiu 3

¹[5] Notiꞌi womo Pueꞌ Yesu pe aku, “Iꞌukiꞌmo lolita hieꞌe pe malaꞌeka to morewahi jumaꞌa i kota Sardis: Hieꞌemo lolitaNe to moꞌompui Inohaꞌna Pueꞌ Ala to pitu,[6] hei motiko pitu betueꞌ to mantiꞌi: Kubahaꞌ hapo to iwalikei. Tekareba, ingkei to mepoꞌohikei, hantarowae kotuꞌuana mahi pepoꞌohimi!

²Iomo horiana majaga-jagakei! Ipokarohokei pepoꞌohimi to uwaꞌ tene ikohandoaꞌna tene mahi, alaꞌ lekiꞌ-lekiꞌna to iwalikei Kuꞌokiꞌmo, hei handoaꞌi tene maganaꞌ i peꞌoꞌelena Pueꞌ Ala UmoꞌKu.

³Io horiana Kutiꞌikikei: hangangaa iponindikei poturuꞌ to ihorimokei hei to itorimokei hampiha. Ipetuntuimokei poturuꞌ tiꞌo, hei mengkatobaꞌmokei ka dosami. Majaga-jagamokei alaꞌ ane hawaꞌkei hatoꞌo, hawaꞌkei ibahaꞌ hiwaꞌimbo kohupaꞌKa. Aku humeiꞌA mampohidupaꞌkikei hibali kohupaꞌna topanako.

⁴Angkana uwaꞌ tene haꞌumbora duo toaꞌ i lumbumi i Sardis to morewahi kotuwuꞌra hingkeꞌna hawaꞌhi nopomokomaꞌ dosa. Iohi hingkiꞌ matengkaꞌhi hiꞌoꞌalu hante Aku, hei hingkiꞌ mopakeꞌhi baduꞌ to popuhiꞌ alaꞌ iohi to masipatoꞌ Kupoꞌawa.

⁵Himo to penani ka kuasaꞌ topekelo, hingkiꞌ nibaduꞌihi baduꞌ to popuhiꞌ, hei konaꞌra hawaꞌi hingkiꞌ Kupahi ka suraꞌ[7] poꞌukiꞌa konaꞌra toaꞌ to pahua kotuwuꞌ to wolaꞌ to hawaꞌi mokoꞌukoa. Hei i hinarona UmoꞌKu hante malaꞌekaNa, iohi hingkiꞌ Kupangakuꞌhi mpuꞌu koꞌioramo toaꞌKa.[8]

⁶Moromiꞌ mpololeke ane ipoꞌilalikei hapo to notiꞌi Inohaꞌna Pueꞌ Ala pe jumaꞌa-jumaꞌa.”

⁷[9] Notiꞌi womo Pueꞌ Yesu pe aku, “Iꞌukiꞌmo lolita hieꞌe pe malaꞌeka to morewahi jumaꞌa to i kota Piladepia: Hieꞌemo lolitane Toaꞌ to mangkolehi hei tuꞌu. Iomo to motiko pegili wambaꞌ kodatuana hi Daudi. Iomo to hingkiꞌ mampokononto himo to hingkiꞌ mekahi pe kodatua to noparentai Datu to Mamposalamaꞌ. Iolu to moweaꞌ wambaꞌ, hei ane Noweaꞌi, hawaꞌi uwaꞌ to hohumbo mowiti. Hei ane Nowitiꞌi, hawaꞌi uwaꞌ to hohumbo moweaꞌ.

⁸Notiꞌi: Kubahaꞌ hapo to iwalikei. Ele, Kuweaꞌkikei wambaꞌ hei hawaꞌi hohumbo rowiti, alaꞌ Kubahaꞌ kohawaꞌmi rahi nipohibahaꞌ, angkana tontona ipetuntuikei poturuꞌKa hei hawaꞌi woꞌo isapuakakei koꞌipoꞌohingKakei.

⁹Uwaꞌhi toaꞌ i lumbumi to mantiꞌi koꞌiora toYahudi, angkana mowutihi. I lalira, handoꞌiohi toYahudi; topegurunahi Belisiꞌ. Toaꞌ tiꞌo, hingkiꞌ Kukomi humei pe ingkei, hingkeꞌna melingkotuꞌhi i hinaromi, hei hingkiꞌ ropangakuꞌ, ‘Kotuꞌuna, Pueꞌ Yesu mampokarimakei mpololeke!’

¹⁰Alaꞌ koꞌipetuntuinamokei hawaꞌKa to mantiꞌi hangangaa mantahakei, hingkiꞌ Kupodaꞌkei i lali komasusami i tempo komaporiꞌ to hingkiꞌ morumpa humanele duniaꞌ. Lekiꞌ-lekiꞌna toaꞌ to meꞌohaꞌ i duniaꞌ i tempo komaporiꞌ tiꞌo hingkiꞌ pahuahi komasusa.

¹¹Hamboaꞌmo morue hingkiꞌ hupaꞌA, mewali hangangaa ipoꞌilalikei mpololeke poturuꞌ to ibahaꞌkei, hingkeꞌna hawaꞌi uwaꞌ to mamperompoꞌi totali datu alaꞌ kopenanimi. Inioꞌ mpuꞌu itorimokei toaꞌ to mampomonawuꞌkei, koꞌukoana hawaꞌkei pahua howonina tiꞌo.

¹²Himo to penani ka kuasaꞌ topekelo, hingkiꞌ Kupopewalihi hibali ori to mampokaroho Tambina Pueꞌ Ala wute nantolou-louna. I wotara hingkiꞌ kuꞌukiꞌ konaꞌna Pueꞌ Ala UmoꞌKu hei konaꞌna kota Pueꞌ Ala. Kota tiꞌo iomo Yerusale to wolaꞌ to hingkiꞌ mengkohou humei ka suruga ka Pueꞌ Ala UmoꞌKu. Hatoꞌo woꞌo hingkiꞌ Kuꞌukiꞌ i wotara konaꞌKu to wolaꞌ, tandaꞌ koꞌiora toaꞌKu.

¹³Moromiꞌ mpololeke ane ipoꞌilalikei hapo to notiꞌi Inohaꞌna Pueꞌ Ala pe jumaꞌa-jumaꞌa.”

¹⁴[10] Notiꞌi womo Pueꞌ Yesu pe aku, “Iꞌukiꞌmo lolita hieꞌe pe malaꞌeka to morewahi jumaꞌa to i kota Laodikia: Hieꞌemo lolitane Toaꞌ to nitiꞌi Amin to mewali petatikoana to mampokaroho dandina Pueꞌ Ala. Iomo Sabiꞌ to nipoꞌohi to mampowute hapo to tuꞌu noniuꞌ Pueꞌ Ala. Iomo pongkane lekiꞌ-lekiꞌna to nopopewali Pueꞌ Ala.

¹⁵Kubahaꞌ hapo to iwalikei. Hibalikei uwai, nitiꞌi motaheꞌ hawaꞌi woꞌo, nitiꞌi mololaho hawaꞌi woꞌo. Aginamo motaheꞌ ba molahokei.

¹⁶Angkana mololaho andolukei; hawaꞌkei molaho hei hawaꞌkei woꞌo motaheꞌ. Iomo horiana hingkiꞌ Kupeburokikei.

¹⁷Itiꞌikei sugiꞌmokei, moromiꞌmo kotuwuꞌmi, hamboaꞌmo uwaꞌ komakuraꞌmi. Angkana, hawaꞌkei ibahaꞌ kohohumbona kotuwuꞌmi! Makaja mpololeke komerima-rimami! Merima-rimakei, bilokei, hei melolawakei.

¹⁸Iomo horiana Kutiꞌikikei, aginamo mehilikei bulawa ka Aku to ukomo nihowui hingkeꞌna mewalikei sugiꞌ. Hangangaa mehilikei woꞌo baduꞌ mpopuhiꞌ hei ipakeꞌkei hingkeꞌna hawaꞌkei mohili alaꞌ noꞌokiꞌkei toaꞌ melolawa. Hangangaa mehilikei woꞌo pokuliꞌ mata nipopokuliꞌi matami hingkeꞌna pangkiꞌkei.

¹⁹Lekiꞌ-lekiꞌna toaꞌ to Kupokarima, Kukamoroki hei Kulabehiꞌ. Iomo horiana Kutiꞌi, ipokarohokei lalimi, hei mengkatobaꞌkei!

²⁰Ele! Aku, metotiꞌiꞌA i wambaꞌ, hei Kukadoꞌ wambaꞌ tiꞌo. Ane nohoriꞌi tumpu tambi pedodoeꞌka hei mampoweaꞌkiꞌA wambaꞌ, hingkiꞌ mekahiꞌA hei meꞌohaꞌA i io, hei hingkiꞌ mangkaka moꞌawa i lali pohintuwuꞌ.

²¹Himo to penani ka kuasaꞌ topekelo, hingkiꞌ Kupopahura moꞌawa hante Aku i pahura kodatuangKu, hibali Aku penanimoꞌA, hei mahuraꞌA moparenta moꞌawa hante UmoꞌKu i pahura kodatuaNa.

²²Moromiꞌ mpololeke ane ipoꞌilalikei hapo to notiꞌi Inohaꞌna Pueꞌ Ala pe jumaꞌa-jumaꞌa.”