Read Rampi Wahiu 4 Bible Online

Wahiu 4 - Rampi bible

Wahiu 4

¹Uko tiꞌo, uwaꞌ womo pampeponoꞌokiꞌi. Aku hi Yohanes pangkiꞌa wambaꞌ to moweaꞌ i suruga, hei kuhori womo loaꞌ hibali monina torompeꞌ to kuhorimo hampiha. Notiꞌikiꞌa, “Mehendeꞌmoko humei! Hingkiꞌ Kutidoꞌkiko hapo to hangangaa mewali i ando to hingkiꞌ dongkaꞌ.”

²I tempo tiꞌo woꞌo, nokuasaꞌimoꞌa Inohaꞌna Pueꞌ Ala, hei kuꞌokiꞌ haꞌanu pahura kodatua i suruga. Uwaꞌ Haduo to mahura i pahura tiꞌo.

³Lentena moꞌindoꞌ mpololeke hei manakiꞌ hibali watu mpisiꞌ to mangkomomataꞌ hei momeaꞌ. Hei uwaꞌ halangkaꞌ hibali tantoroꞌoꞌue to manakiꞌ motuleliꞌi pahura datu tiꞌo.

⁴Hei pahura kodatua tiꞌo notuleliꞌi rompuluꞌ iba pahura ntaniꞌna. Pahura tiꞌo ropahurai tadulako-tadulako to rompuluꞌ iba, mebaduꞌ to popuhiꞌ hei metotalihi bulawa.

⁵Pahura datu tiꞌo mewiaꞌ hei meboluntuꞌ nturusi. I hinarona pahura tiꞌo, uwaꞌ pitu onu huluꞌ to makiꞌ. Huluꞌ tiꞌo, palaihana pitu langkaꞌ jamana Inohaꞌna Pueꞌ Ala.

⁶Uwaꞌ woꞌo i hinarona pahura tiꞌo, hibali tahiꞌ to moꞌinoto, lentena moꞌinoto mpololeke hibali watu kaca. Pahura kodatua tiꞌo notuleliꞌi woꞌo iba langkaꞌ to tuwuꞌ.[11] Woriꞌ mpololeke matare. Lekiꞌ-lekiꞌna wotara nokoꞌuwaꞌi mata, moromiꞌ i hinarora, moromiꞌ i tundura.

⁷Ka to tuwuꞌ tiꞌo, halangkaꞌ hibali singa. Korolangkaꞌna hibali gapiꞌ laki. Kotolu langkaꞌna hibali toaꞌ. Koꞌiba langkaꞌna hibali muntuꞌ to kolentuꞌana meloka.

⁸To tuwuꞌ iba tiꞌo mokepaꞌ oni onu, hei lekiꞌ-lekiꞌna wotara kemata. Howeꞌ i luaꞌ kepaꞌra, kemata woꞌo. Ando wini, molingahi nturusi, rotiꞌi: “Mangkolehi! Mangkolehi! Mangkolehi mpuꞌu Pueꞌ Ala! Iomo to meliu kuasaꞌNe ka lekiꞌ-lekiꞌna, Io to uwaꞌmo umbiꞌ mepongka ka uluꞌ-uluꞌna, to uwaꞌ hinewowoꞌena, hei to hingkiꞌ uwaꞌ nturusi wute nantolou-louna!”

⁹Totuwuꞌ tiꞌohi mantiꞌi woriꞌ komoromiꞌNa, moꞌadaꞌi hei mampokodeꞌhi konaꞌna Haduo to mahura i pahura kodatua hei to tuwuꞌ nturusi wute nantolou-louna. Ipampowutera pepokodeꞌ,

¹⁰tadulako-tadulako to rompuluꞌ iba metumpapaꞌhi i hinarona Haduo to mahura i pahura kodatua hei to tuwuꞌ nturusi wute nantolou-louna. Molulehi totali kodatuara i hinarona pahurahaNa tiꞌo, tandaꞌ peꞌadaꞌira. Uko tiꞌo, rotiꞌi:

¹¹“Pueꞌ Ala, Pueꞌki! Ingkomo to masipatoꞌ ropokodeꞌ hei niꞌadaꞌi. Ingkolu to makuasaꞌ, alaꞌ Ingko to mowali hinangkana. Nokomi peleihaMu, Ipopewali hei Ipotuwuꞌ lekiꞌ-lekiꞌna to uwaꞌ.”