Read Rampi Wahiu 5 Bible Online

Wahiu 5 - Rampi bible

Wahiu 5

¹Mepongka katoꞌo, kuꞌokiꞌ womo, uwaꞌ suraꞌ to tepilulu i korawe koanana Haduo to mahura i pahura kodatua. Suraꞌ tiꞌo buhaꞌ hante ukiꞌ mpotimali, nilulu, honiꞌi rototandaꞌi hante pitu onu petandaꞌi[12] hingkeꞌna ohina hawaꞌi hohumbo robasa.

²Kuꞌokiꞌ uwaꞌ haduo malaꞌeka to maroho to moloaꞌ nopokobue, notiꞌi, “Himo to masipatoꞌ moꞌuweꞌ petandaꞌina hei mowuraꞌ hante mobasa ohina?”

³Hawaꞌi uwaꞌ howeꞌ haduo to wadi mowuraꞌ suraꞌ tiꞌo hei mobasa ohina. Howeꞌ i suruga ba i duniaꞌ ba i peꞌohaꞌa to mahi, hawaꞌi uwaꞌ haduo to masipatoꞌ.

⁴Meꞌolaꞌa nokomi kohanondoihangku, alaꞌ hawaꞌi uwaꞌ haduo to rohua to masipatoꞌ mowuraꞌ suraꞌ tiꞌo hei mampeꞌele ohina.

⁵Uko tiꞌo, haduo ka tadulako-tadulako to rompuluꞌ iba mampatiꞌikiꞌa, “Hampoliꞌmoki meꞌola. Ele! Uwaꞌ Haduo to nitiꞌi Singa, ka toYehuda[13] to nopemuleꞌki datu Daudi.[14] Io to makuasaꞌ hei penani. Iolu to makuasaꞌ moꞌuweꞌ pitu petandaꞌi tiꞌo hei mowuraꞌ suraꞌ tiꞌo.”

⁶Uko tiꞌo, kuꞌokiꞌ Anaꞌ Gimba metotiꞌi i hirina pahura kodatua tiꞌo to nopelumbui to tuwuꞌ iba hei tadulako-tadulako. I wotana Anaꞌ Gimba tiꞌo, kuꞌokiꞌ mata bilaꞌ konirereꞌaNe. TanduꞌNa pitu onu, hei pitu onu woꞌo mataNe. Iomola pitu Inohaꞌna Pueꞌ Ala to Norumbaꞌ Pueꞌ Ala pe humanele duniaꞌ.

⁷Anaꞌ Gimba tiꞌo ako moroa suraꞌ tiꞌo ka korawe koanana Haduo to mahura i pahura kodatua.

⁸IkoNoroana suraꞌ tiꞌo, totuwuꞌ iba hei tadulako-tadulako to rompuluꞌ iba melingkotuꞌhi i bitina Anaꞌ Gimba. Lekiꞌ-lekiꞌra motiko katapi hante mangkuꞌ bulawa to buhaꞌ hante dupaꞌ. Dupaꞌ tiꞌo, palaihana pekokaera toaꞌna Pueꞌ Ala.

⁹Molinga-lingamohi halangkaꞌ linga to wolaꞌ, rotiꞌi: “Ingkomo to masipatoꞌ moroa suraꞌ tiꞌo hei moꞌuweꞌ petandaꞌina alaꞌ nirokoꞌmoKo. Moliu raꞌaMu to hibobo i komahiMu, Ihompoꞌmohi toaꞌ i humanele duniaꞌ, i lekiꞌ-lekiꞌna kodatua, i lekiꞌ-lekiꞌna pemuleꞌa hei i lekiꞌ-lekiꞌna wiharo, honiꞌi Ipeweihi pe Pueꞌ Ala.

¹⁰Ipopewalihi hibali datu i haꞌanu kodatua hante tadulako mpenomba, hei hingkiꞌ moparentahi hibali datu i womboꞌ duniaꞌ.”

¹¹Uko tiꞌo, kuꞌokiꞌhi malaꞌeka to woriꞌ mpololeke to hawaꞌi mokoꞌihaꞌa, hei kuhori loaꞌre. Metotiꞌihi mantuleliꞌ. To rotuleliꞌi iomo pahura kodatua hei totuwuꞌ iba hante tadulako-tadulako.

¹²Molingahi ropokobue, rotiꞌi: “Anaꞌ Gimba to nirereꞌ, masipatoꞌ mpololeke toꞌadaꞌi hei topokodeꞌ Topokodeꞌ konaꞌNe, alaꞌ komarohoNa, alaꞌ komanobaꞌNa, alaꞌ komapandeNa, alaꞌ komakuasaꞌNa!” alaꞌ kosugiꞌNa

¹³Uko tiꞌo, kuhori womo lekiꞌ-lekiꞌne to tuwuꞌ i suruga, i duniaꞌ, i peꞌohaꞌa to mahi, hei i lali tahiꞌ, lekiꞌ-lekiꞌna to tuwuꞌ molingamohi waheꞌe: “Topokodeꞌ hei toꞌadaꞌiHi, iomo Pueꞌ Ala to mahura i pahura kodatua hei Anaꞌ Gimba, alaꞌ komakuasaꞌRa hei komanobaꞌRa wute nantolou-louna!”

¹⁴To tuwuꞌ to iba tiꞌo mehoniꞌ, “Amin!” Hei tadulako-tadulako to rompuluꞌ iba tiꞌo melingkotuꞌhi menomba pe Io.