Read Rampi Wahiu 6 Bible Online

Wahiu 6 - Rampi bible

Wahiu 6

¹Uko tiꞌo, kuꞌokiꞌ Anaꞌ Gimba tiꞌo moꞌuweꞌ petandaꞌi to kaꞌisaꞌ ka to pitu onu tiꞌo. Kuhori halangkaꞌ ka to tuwuꞌ iba tiꞌo mewowoi nopokobue hibali monina boluntuꞌ, notiꞌi, “Humeimoko!”

²Hangkaꞌ-hangkaꞌ romo, kuꞌokiꞌ hambaꞌa nara to popuhiꞌ. Hei to melambaꞌ i nara tiꞌo motiko pana, hei nipaꞌani haꞌanu totali. Katoꞌo noloumo ako moponiꞌ hei penani.

³Uko tiꞌo, Anaꞌ Gimba moꞌuweꞌ womo petandaꞌi to kadua, hei kuhori to tuwuꞌ korombaꞌana mantiꞌi, “Humeimoko!”

⁴Hupaꞌ womo hambaꞌa nara. Nara tiꞌo momeaꞌ mpololeke, hei to melambaꞌ i nara tiꞌo, nipaꞌani hamato piho to kodeꞌ hei kuasaꞌ mokero pohintuwuꞌra toaꞌ i duniaꞌ wute momerokoꞌhi.

⁵Anaꞌ Gimba moꞌuweꞌ womo petandaꞌi to katolu, hei kuhorimo to tuwuꞌ katoluna mantiꞌi, “Humeimoko!” Kuꞌokiꞌ womo hambaꞌa nara. Nara tiꞌo moꞌiti hei to melambaꞌ i nara tiꞌo motiko haꞌanu petimba.

⁶Ikopehupaꞌna nara to moꞌiti tiꞌo, kuhori to hibali loaꞌ to mololita ka lumbura to tuwuꞌ iba, notiꞌi, “Hinamoiae masuliꞌ hiline boi hante tiwo, Angkana inioꞌ irokoꞌi loti saitu hante anggoroꞌ.”[15]

⁷Uko tiꞌo, Anaꞌ Gimba moꞌuweꞌ womo petandaꞌi to kaꞌiba, hei kuhori to tuwuꞌ koꞌibana mantiꞌi, “Humeimoko!”

⁸Kuꞌokiꞌ womo hambaꞌa nara to mangkomomataꞌ. Konaꞌna to melambaꞌ nara tiꞌo iomo “Komahi,” hei to mehuntu ka io nikokeneꞌi “Peꞌohaꞌa to mahi.” To roduo tiꞌo nipaꞌanihi kuasaꞌ morokoꞌ hadolaꞌ iba ka lekiꞌ-lekiꞌna toaꞌ moliu: mahi i lali poponiꞌa, mahi bilora, mahi norumpa hakiꞌ to melolihiꞌ, hei norokoꞌ pinatuwuꞌ to meꞌoꞌoka.

⁹Uko tiꞌo, kuꞌokiꞌ womo Anaꞌ Gimba moꞌuweꞌ petandaꞌi to kalimo. Kuꞌokiꞌ i luaꞌ potutua popenomba,[16] uwaꞌhi tanuanaꞌne toaꞌ to nirokoꞌ alaꞌ mampoꞌohihi pohawaꞌna Pueꞌ Ala hei pampowutera kareba noniuꞌ hi Yesu Pueꞌra.

¹⁰Mewowoihi ropokobue, rotiꞌi, “O Pueꞌ to makuasaꞌ, mangkolehi hei mononto! Haꞌumbo tene komoruene honiꞌi Ihukuhi toaꞌ to kodake to meꞌohaꞌ i duniaꞌ? Haꞌumbo tene komoruene honiꞌi Ihowoni waliare to morokoꞌka?”

¹¹Lekiꞌ-lekiꞌra nipaꞌani juba to popuhiꞌ hampepaꞌ-hampepaꞌ. Hei Pueꞌ Ala mantiꞌi, “Sabaraꞌkei duluna, alaꞌ uwaꞌ tene awami to hampajojamami hante halali hampepoꞌohimi to hingkiꞌ nirokoꞌhi hibali woꞌo ingkei. Ane ganaꞌmoꞌi koworiꞌmi to hingkiꞌ nirokoꞌ, honiꞌi Kuhowonihi poniꞌmi.”

¹²Uko tiꞌo, kuꞌokiꞌ womo Anaꞌ Gimba moꞌuweꞌ petandaꞌi to ka oni. Hangkaꞌ-hangkaꞌ romo meluanoko to makaja, ando mewali mokorindi mpololeke, hei wula mewali momeaꞌ hibali raꞌa.

¹³Betueꞌ i umbo-umbolu monawuꞌ ka laniꞌ toꞌu pe duniaꞌ, hibali komonawuꞌna wuaꞌ loti to handoaꞌi tene mangke ane noniuꞌi parowo to makaja.

¹⁴Laniꞌ hangkaꞌ-hangkaꞌlu tepilulu hibali aliꞌ, hei lekiꞌ-lekiꞌna biri hei lekiꞌ-lekiꞌna leowuta i tahiꞌ, terungkeꞌ ka koꞌuwaꞌana.

¹⁵I tempo tiꞌo, datu-datu i duniaꞌ, to i womboꞌ-womboꞌna, tadulako tantara, tosugiꞌ, toaꞌ to makuasaꞌ hei lekiꞌ-lekiꞌna toaꞌ ntaniꞌna, wute-wute i toaꞌ biasa hante hawiꞌ, mewunimohi lekiꞌ-lekiꞌra i lali woloꞌ watu ba i kohelaꞌ-kohelaꞌ watu,

¹⁶hei iohi mololitahi ropokobue pe biri hei pe watu, rotiꞌi, “Ihidaka! Hingkeꞌna tewunika ka peꞌoꞌelena Haduo to mahura i pahura kodatua, hingkeꞌna hawaꞌka norumpa pehuku ka Anaꞌ Gimba tiꞌo!”

¹⁷Alaꞌ hupaꞌmo ando to mekororokaꞌi[17] Katoꞌo i tempo tiꞌo, Pueꞌ Ala hante Anaꞌ Gimba hingkiꞌ mohukuhi lekiꞌra.[18]