Read Rampi Wahiu 7 Bible Online

Wahiu 7 - Rampi bible

Wahiu 7

¹Uko tiꞌo, kuꞌokiꞌhi iba malaꞌeka to metotiꞌi i iba dolaꞌna duniaꞌ, hori-hori motahahi iba parowo hingkeꞌna hawaꞌi uwaꞌ parowo to meparowo i tahiꞌ ba i lorina ba i lopoꞌ.

²Hei kuꞌokiꞌ haduo malaꞌeka to ntaniꞌna mehupaꞌ ka motoꞌando mangkomi petandaꞌi to ka Pueꞌ Ala to tuwuꞌ, nipopotandaꞌi toaꞌna Pueꞌ Ala. Malaꞌeka tiꞌo mololitamo nopokobue mampatiꞌikihi malaꞌeka to iba to makuasaꞌ mokero duniaꞌ hante tahiꞌ, notiꞌi,

³“Inioꞌkei duluna mokero tahiꞌ, ba lorina ba lopoꞌ, ane handoaꞌi tene kitandaꞌi rouꞌne hawiꞌna Pueꞌ Ala Pueꞌta, hingkeꞌna hawaꞌhi norumpa kohorewuꞌ tiꞌo.”

⁴Hei uwaꞌ to mampatiꞌikiꞌa koworiꞌna to nitandaꞌi: hanatu iba mpuluꞌ iba sabu. To rototandaꞌi tiꞌo, ka hampuluꞌ merontino pemuleꞌana toSaraeli.

⁵Ka muleꞌna Yehuda, hampuluꞌhi rosabu to rotandaꞌi. Hatoꞌo woꞌo ka muleꞌna hi Rube, ka muleꞌna hi Gati,

⁶muleꞌna hi Aser, muleꞌna hi Natali, muleꞌna hi Manase,

⁷muleꞌna hi Simeo, muleꞌna hi Lewi, muleꞌna hi Isakari,

⁸muleꞌna hi Sebulo, muleꞌna hi Yusuf, hei ka muleꞌna hi Benami. Ka hantino-hantino tiꞌo, hampuluꞌhi rosabu to rototandaꞌi.

⁹Uko tiꞌo, kuꞌokiꞌ womo toaꞌ to woriꞌ mpololeke; hamboaꞌmo mokoꞌihaꞌa koworiꞌre. Iohi tiꞌo ka humanele duniaꞌ: ka lekiꞌ-lekiꞌna kodatua, lekiꞌ-lekiꞌna pemuleꞌa hei lekiꞌ-lekiꞌna wiharo. Metotiꞌihi i hinarona pahura kodatua hei i hinarona Anaꞌ Gimba. Mebaduꞌhi to popuhiꞌ, hei motikohi taweꞌ torangke tandaꞌ komotanaꞌra.

¹⁰Mololitahi ropokobue, rotiꞌi: “Humeimoki mampokodeꞌ Pueꞌ Ala Pueꞌta to mahura i pahura kodatuaNa! Humeimoki mampokodeꞌ Anaꞌ Gimba alaꞌ Iohi to mamposalamaꞌki!”

¹¹Lekiꞌ-lekiꞌna malaꞌeka motuleliꞌi pahura datu hei tadulako-tadulako to rompuluꞌ iba, moꞌawa hante to tuwuꞌ iba. Melingkotuꞌhi i hinaro pahura tiꞌo, honiꞌi menombahi pe Pueꞌ Ala,

¹²rotiꞌi: “Tuꞌu mpololeke! Humeimoki mampokodeꞌ Pueꞌ Ala Pueꞌta, Topokodeꞌ konaꞌNe, alaꞌ komapandeNa, totiꞌi woriꞌ komoromiꞌna pe Io, toꞌadaꞌi Pueꞌ Ala, alaꞌ komakuasaꞌNa, alaꞌ komarohoNa, wute nantolou-louna! Amin.”

¹³Uko tiꞌo, haduo ka tadulako-tadulako tiꞌo meꞌitano pe aku, notiꞌi, “Ane toaꞌ to mebaduꞌ to popuhiꞌ tiꞌo, ibahaꞌ kohihimora? Ba ibahaꞌ ka imbohi humei?”

¹⁴Kuhoniꞌ, “Tua, hawaꞌhi kubahaꞌ. Ane wadiꞌi itiꞌikiꞌa.” Katoꞌo notiꞌi, “Iohi tiꞌo toaꞌ to ukomohi mampolala tempo komaporiꞌ to makaja mpololeke. Baduꞌra niwaheꞌ hante raꞌana Anaꞌ Gimba mewali popuhiꞌ.[19]

¹⁵Iomo horiana masipatoꞌhi metotiꞌi i hinarona pahuraha kodatuana Pueꞌ Ala, hei menombahi ando wini i lali Tambina Pueꞌ Ala. Hei Pueꞌ Ala to mahura i pahura kodatuaNa hingkiꞌ mampoꞌodaꞌhi.

¹⁶Hamboaꞌmohi bilora, mangkumaro, hei hamboaꞌmohi nokohunei,

¹⁷alaꞌ Anaꞌ Gimba to uwaꞌ i hiri pahura kodatua hingkiꞌ molambaꞌhi. Hingkiꞌ Norandahi nolou pe mata uwai to mepaꞌani kotuwuꞌ to wolaꞌ to hawaꞌi mokoꞌukoa, hei Pueꞌ Ala hingkiꞌ mopahi uwai matara.”