Read Rampi Wahiu 8 Bible Online

Wahiu 8 - Rampi bible

Wahiu 8

¹Konoꞌuweꞌnalu Anaꞌ Gimba petandaꞌi to kapitu, kaliuꞌ mondiiꞌ i suruga kira-kira hantangaꞌ jaa.

²Kuꞌokiꞌ pitu malaꞌeka to metotiꞌi i hinarona Pueꞌ Ala. Malaꞌeka to pitu tiꞌo nipaꞌani pitu torompeꞌ.

³Uko katoꞌo, hupaꞌmo haduo malaꞌeka to ntaniꞌna to metotiꞌi i potutua popenomba. Malaꞌeka tiꞌo mangkomi haꞌanu pangkomia dupaꞌ to niwali ka bulawa, hei dupaꞌ to woriꞌ nipaꞌaniki hingkeꞌna notutuꞌi i tempona lekiꞌ-lekiꞌna toaꞌna Pueꞌ Ala mekokae. Dupaꞌ tiꞌo notutu i womboꞌ potutua popenomba to niwali ka bulawa to uwaꞌ i hinarona pahurahana Pueꞌ Ala.

⁴Ikonotutunalu dupaꞌ tiꞌo, mehendeꞌmo oroꞌne pe hinarona Pueꞌ Ala moꞌawa hante pekokaera toaꞌna Pueꞌ Ala.

⁵Uko tiꞌo, malaꞌeka tiꞌo moroamo pangkomia dupaꞌ, hei noꞌohii wute buhaꞌ hante uwaro to ka potutua dupaꞌ, honiꞌi nopetumpaꞌ pe duniaꞌ. Uko tiꞌo, meboluntuꞌmo, mewiaꞌ, hei meluanoko.

⁶Malaꞌeka to pitu tiꞌo hingkenia, haduo-haduo motiko torompeꞌ timomomohi hingkiꞌ motowuiꞌ.

⁷Malaꞌeka to kaꞌisaꞌ motowuiꞌ torompeꞌna. Kaliuꞌ ura to mowuaꞌ hei api hante raꞌa hibobo ka laniꞌ pe duniaꞌ. Dolaꞌ toluna ohi duniaꞌ noꞌoka api wute-wute i dolaꞌ toluna lopoꞌ hei lekiꞌ-lekiꞌna kora to mangkomomataꞌ.

⁸Malaꞌeka to kadua motowuiꞌ woꞌo torompeꞌna. Kuꞌokiꞌ to hibali haꞌanu biri to kodeꞌ makiꞌ hibali api. Biri tiꞌo nipelubaꞌmo pe lali tahiꞌ koꞌukoana dolaꞌ tolu tahiꞌ tiꞌo mewali raꞌa.

⁹Hadolaꞌ tolu ka lekiꞌ-lekiꞌna to tuwuꞌ i lali tahiꞌ mahi, hei kapalaꞌ to uwaꞌ i womboꞌ tahiꞌ hadolaꞌ tolu mentoriꞌ.

¹⁰Malaꞌeka to kotolu motowuiꞌ woꞌo torompeꞌna. Kaliuꞌ monawuꞌ haꞌanu betueꞌ to kodeꞌ ka laniꞌ, makiꞌ hibali huluꞌ. Betueꞌ tiꞌo motomuni hadolaꞌ tolu uwai to moꞌili hante mata uwai.

¹¹Konaꞌna betueꞌ tiꞌo Asitu palaihana, Mopaiꞌ. Hadolaꞌ tolu ka lekiꞌ-lekiꞌna uwai mewali mopaiꞌ, hei woriꞌ toaꞌ mahi alaꞌ maꞌinuhi uwai to mopaiꞌ tiꞌo.

¹²Malaꞌeka to kaꞌiba motowuiꞌ woꞌo torompeꞌna. Katoꞌo mata ando, wula hante betueꞌ kaliuꞌ hadolaꞌ tolu morutu, koꞌukoana pewantana makuraꞌ hadolaꞌ tolu. Horiana, ane andonaꞌi pewantana ando mengkohou hadolaꞌ tolu. Hatoꞌo woꞌo i tempo wini, hadolaꞌ tolu ka wantana wula hante betueꞌ mengkohou.

¹³Uko katoꞌo, kuꞌokiꞌ uwaꞌ hambaꞌa muntuꞌ to meloka i raoha. Kuhori tinti tiꞌo mololita nopokobue, notiꞌi, “Horewuꞌ! Horewuꞌ! Hingkiꞌ horewuꞌhi toaꞌ to meꞌohaꞌ i duniaꞌ, alaꞌ tolu tene malaꞌeka hingkiꞌ motowuiꞌ torompeꞌna.”