Read Rampi Wahiu 9 Bible Online

Wahiu 9 - Rampi bible

Wahiu 9

¹Uko tiꞌo, malaꞌeka to kalimo motowuiꞌ woꞌo torompeꞌna, hei kaliuꞌ kuꞌokiꞌ haꞌanu betueꞌ monawuꞌ ka laniꞌ toꞌu i duniaꞌ. Betueꞌ tiꞌo nipaꞌani pegili potutuꞌina woloꞌ to hawaꞌi mokohukaꞌa kokuladune.

²Betueꞌ tiꞌo mohungkaꞌ petutuꞌi woloꞌ tiꞌo. Konohungkeinalu, mesuwumo oroꞌ to makaja, hibali oroꞌ to peꞌoka. Ando hei raoha mewali mokorindi, nohida oroꞌ to ka woloꞌ tiꞌo.

³Ka lali oroꞌ tiꞌo, mesuwumohi popae mengkotoꞌu i duniaꞌ. Popae tiꞌo nipaꞌanikihi kuasaꞌ metotio, hibali petotiona olupa.

⁴Popae tiꞌo, hawaꞌhi nipoliu mampokarugiꞌ kora ba loti hei huꞌa-huꞌa. To wadi ropokarugiꞌ, toaꞌ to hawaꞌi uwaꞌ tandaꞌ i rouꞌra to nopaꞌanikihi Pueꞌ Ala.

⁵Hei hawaꞌhi woꞌo nipoliu morokoꞌ toaꞌ, angkana mampoperima-rimaluhi limo mbula komoruene. Petotiora popae tiꞌo hibali woꞌo komolalona petotiona olupa.

⁶I lali limo mbula tiꞌo, toaꞌ rokodokoꞌi mahi, angkana hawaꞌhi mahi, hei mampaliꞌhi lala hingkeꞌna romahi, angkana hawaꞌhi hohumbo mahi.

⁷Lentera popae tiꞌo hibali lentena nara to ropehendeꞌi surodadu nolou moponiꞌ. I tutuꞌra uwaꞌ to hibali totali bulawa. Liora hibali lio toaꞌ.

⁸Wilolura kurauꞌ hibali wilolu towoweꞌe, hei nihira hibali nihi singa.

⁹Bobariꞌra telopihi hante baduꞌ besi. Monina kepaꞌra hibali peroruuna kereta to woriꞌ to noruiꞌ nara nolou moponiꞌ.

¹⁰Lelora hibali lelo olupa. I lelora tiꞌo, uwaꞌ kuasaꞌ mampoperima-rima toaꞌ limo mbula komoruene.

¹¹Uwaꞌ dature to moparentaihi. Datura tiꞌo iomo malaꞌeka to kodake to mampoꞌodaꞌ woloꞌ. Konaꞌna i wiharo Ibarani iomo hi Abadon. I wiharo Yunani hi Apolio, palaihana: to mepohorewuꞌ.

¹²Tutumo kohorewuꞌ to uluꞌ-uluꞌna. Angkana uwaꞌ tene rolangkaꞌ kohorewuꞌ to hingkiꞌ mehuntu.

¹³Uko tiꞌo, malaꞌeka to ka oni motowuiꞌ torompeꞌna. Kuhori loaꞌ ka iba tanduꞌ-tanduꞌ to i polohuna potutua popenomba to rowali ka bulawa to i hinarona Pueꞌ Ala.

¹⁴Notiꞌi loaꞌ tiꞌo pe malaꞌeka to ka oni, “Ipolohomohi malaꞌeka to iba to nihiluꞌ i uwai Epara.”

¹⁵Nopolohoꞌmohi mpuꞌu. Malaꞌeka to iba tiꞌo ropatimomo umbiꞌ hingkeꞌna i toꞌa, i wula, i ando hei i jaa to nopokonontokihi Pueꞌ Ala, morokoꞌhi hadolaꞌ tolu ka lekiꞌ-lekiꞌna toaꞌ.

¹⁶Surodadu topenara to metuntu pe iohi, ronatu juta koworiꞌre. Kubahaꞌ koworiꞌre, alaꞌ uwaꞌ to mampatiꞌikiꞌa.

¹⁷I lali pampeponoꞌokiꞌi, kuꞌokiꞌhi surodadu tiꞌo hante nara to ropelambaꞌi. Surodadu tiꞌo, lekiꞌ-lekiꞌra mebaduꞌ besi. Baduꞌra momeaꞌ, momataꞌ hei molingkokuniꞌ. Tutuꞌ narara hibali tutuꞌ singa, hei ka lali omeꞌra mesuwu api, oroꞌ hei belerang.

¹⁸Hadolaꞌ tolu toaꞌ norokoꞌ hante tolu langkaꞌ to mepohorewuꞌ iomo: api, belerang hei oroꞌ to mesuwu ka omeꞌra nara tiꞌo.

¹⁹Komakuasaꞌra nara tiꞌo uwaꞌ i omeꞌra hante i lelora alaꞌ lelora hibali tutuꞌ ule to mebobingku. Lelora tiꞌo ropakeꞌ mohorewuꞌi toaꞌ.

²⁰Angkana toaꞌ to hawaꞌi norokoꞌ to mehorewuꞌi tiꞌo, bateꞌna hawaꞌhi mengkatobaꞌ ka waliara to kodake. Hawaꞌhi hiniꞌ mengkatobaꞌ ka koperorokoꞌra, pedotira, panakora, hante waliara to mekokomaꞌi. Menombahi nturusi pe lomoa hei pe lentena lomoa kehapoꞌi lente tiꞌo rowali hadoduora. Lente tiꞌo rowali ka bulawa, peraꞌ, tembaga, watu, ba ka loti. Lente to rowali tiꞌo, hawaꞌhi pangkiꞌ, hawaꞌhi pohori, hawaꞌhi woꞌo hohumbo matengkaꞌ.