Read Ranglong SAM 10 Bible Online

SAM 10 - Ranglong bible

SAM 10

¹O PUMA, ichangmo alapa na nei anding? Ichangmo antak laia nei anthup?

²Mi salui ngai omlianna sika mi anriang ngai anzula a om u; asanok ei mandon u ngaia han amani nget anok u rase.

³Mi saluiin chu a malung zot dan a manliana; mi huatanham in chu a maka, a elsel chachak.

⁴Mi saluiin anphuola, ama arok no ning atia; a mandonna ngai dora chu “Pathian ngal om mak” duai ke.

⁵A omdan ngai chu adet chian keng. Na ruirilna ngai chu chung tiang alapa na, muphasama a om; ama adui ngai chu mani ero atho chachak.

⁶A malunga, “Annik no ning; ka khuk ka bana tena antaka om no ning” a ti na.

⁷A bai chu khomak samna ngai, anhuangna ngai, ansinsakna ngai le abita; amalei thuaia han ansialna le dik nokna a om.

⁸Kho tina lamruang thona muna ansut chachaka, mun anthim riai nana siatna bui mi ngai athat chachak. Amit le ite tho thei lui mi chu a sur rang lamruang atho chachak.

⁹Akoibakneiin a puka lamruang ei tho anga aman mun anthimna na lamruang atho chachak. Min riang ngai a sur rang lamruang atho chachak; min riang ngai chu asura, han keng a len le a nuk chachak.

¹⁰A manpera, amanbu na; ite tho thei lui mi ngai chu mi rat ngaiin a manba u chachak.

¹¹A malunga han “Pathianin ei mangil ke! Amai chu a mahipa; na mu ngal thei no ni!” a ti chachaka.

¹²O PUMA, anthui ro; O Pathian, na kut honga lang ro! Mi anriang ngai chu mangil no ro!

¹³Hongsikamo mi salui ngaiin Pathian ei mumak a, a malunga “arok no ning” ei ti chachak?

¹⁴Mu chu na mu zeia; na kuta athuan ranga asiat atho ngai le anuar ngai na en chiana; ite tho thei lui mi chu na koma hong anbetok chachaka. Pa don lui a sanpu nei ni chachak ha.

¹⁵Mi salui ban chu makhiak ro; mi salui chu, ei sanokna ngai rasua pe ro, na mu len maseng chu.

¹⁶PUMA chu kumkhua taituan ranga Rengkhit ani. Namtin chu ama ram ata anpei u zei.

¹⁷O PUMA, nangin omannuai ngai zot dan chu na rangai pe na; a malung u chu manngir pe na tia, a he rangai pe na ti.

¹⁸Pa bui ngai le anpangsepa om ngai ruiril na rang; hankeng, phila mi chu anchiruana ei om lai nokna rang.