Read Ranglong SAM 105 Bible Online

SAM 105 - Ranglong bible

SAM 105

¹PUMA kom raisanna ril ro, ei lianna tang ahai ro; namtin ril ro imo ei tho.

²PUMA anpakna la tho ro; tichangabui ei tho ngai ril ro.

³Ama ta nei ni na raimansan ro, anmok ngai dora ril ro raimansan rase.

⁴Ana san ranga PUMA kom se ro; hatuka mongluia amok ro.

⁵Nangni Abraham akhuk asuak ngai nangni Jakob akhuk ha eia thang ha: boidong sin PUMAN ei tho mangil u no ro hatuka rui ei sat ngai ha.

⁷PUMA chu koini na Pathian; a chongpek ngai ramual dora rang.

⁸a chongtin umora rang siak inti a chongtin ngai khuk asang rang.

⁹Abraham le anngoina ei sin siak inti hatuka Isak koma a chongtin.

¹⁰PUMAN Jakob le chong ei tin, hava ha taituana rang.

¹¹Kanan ram na pe ka ting ati, na theia na ram lua rang ni inti.

¹²Pathian mi ngai atom te u, Kanan rama khual anga.

¹³Ram atei ateia cheianvai u reng ram khata reng ram ateia.

¹⁴Ten Pathianin min pengsom ei tho rang phal mak arung ranga reng ngai he manriat.

¹⁵Ka suak thang ngai manna no ro ka deari ngai ton no ro.

¹⁶PUMAN a ram u na maitam a masul neksak dora akhai.

¹⁷Tenchu a maton u na mikhat atir Joseph suakamin anga anzuar ha.

¹⁸A ke zingzir le ankhita, a ring thir namri le anthung.

¹⁹Ei ril ngai akip maseng. PUMA chongin adik atia apom.

²⁰Hatuka Aigupta rengin a mazok; ram a rungpun a mazoka.

²¹A ram aruai ranga apeka ram dora aruai ranga aphun.

²²Reng a ulian ngai chunga ningneina dona ama san ngai chunga ningneina dona.

²³Hatuka Jakob Aigupta na ase hava rama han ava om.

²⁴PUMAN a mi ngai rang nai atam apek a raldui ngai neka arata asin.

²⁵Aigupta ngai ha a mi ngai aman mumak a huanga a sinsak u na.

²⁶Hatuka a suak eia thang Mosi le Aron atir.

²⁷Pathian sin alian athona Aigupta na boidong sin a manlang u.

²⁸Pathianin hava rama a manzinga tenchu Aigupta ramin a chong tel mak.

²⁹A tidung u ngai thi a manchanga nga ngai dora athat.

³⁰A ram u uichok abita reng mun ngal abita.

³¹Chong apeka mathui rik, aram sunga ahonga bita.

³²Aram u na arial le khuanlek atira rua rathula;

³³Gerep rang le theipui kung amasiata thing ngai dora amasiat.

³⁴Chong apeka khai ngai ahong sasi tel sua salui;

³⁵hava rama chiak dora asak u; anna dora asak u.

³⁶Aigupta insung kipa pasal arapa athat.

³⁷Hatuka Israel ngai a manse; rangkachak rupa achoi u alom u na adama ranak anei u.

³⁸Aigupta ngaiin achi u ase u na arai asan u.

³⁹Pathianin a mi ngai chunga ansum asiak zana moi a el ranga asiak.

⁴⁰Azong u na vamim a manhong; anvan ata neksak azon ei khop u na rang.

⁴¹Lung a malonga ti asuak philchara tidung anga aluang.

⁴²A chongtin mangil pial mak asuak Abraham akoma.

⁴³Hantin han a mi thang ngai a rasuana raisana la thona ankhek u.

⁴⁴Mi ram apek mi phai aman lua,

⁴⁵hankeng a mi ngaiin a riti ei tel u na rang a chongpek dora ei tel u rang. PUMA chu manpak ro!