Read Ranglong SAM 106 Bible Online

SAM 106 - Ranglong bible

SAM 106

¹PUMA chu manpak ro! PUMA kom raisanna ril ro, ama chu asing. A lungkham chu taituan keng.

²Ei tho ngai tumo aril thei? Ahun baka tumo anpak thei?

³Achanasa ngai chu a he tel ngai a dika tho ngai.

⁴PUMA na mi ngai na san le na re ro; na mazok le na manchel ro.

⁵Na mi ngai ei anson na manmu ro na mi ngai raisanna chang rang na mi ngai raisan anlian nana.

⁶Na chipui ngai anga koinim asia na tho; asiat le dik lui na ni.

⁷Na chipui ngai Aiguptana Pathian tichangabui sintho rethei u mak; itukmo a lungkham ei manmu a mangil u. athotheikiar aduia aset u tipui asen taka han.

⁸Ten a chongtin anga a mazok, aranak ei mu u theina rang.

⁹Tipui sen chong apeka ahul phat a mi ngai phil ahula a mankan.

¹⁰An mumak ngai ata a mazok; a raldui ata a mazok.

¹¹A raldui ngai tin alima angkhat ngal zok u mak.

¹²Hatuka ami ngaiin a chongtin aiam u, ama anpakna la atho u.

¹³Tenchu ei tho ngai anrapa amangil u a he reluia singansa len u.

¹⁴Philchar rama ningolna le abit u na Pathian a mansin u,

¹⁵Hasik han imo ei zong u apek, ten rikhua a masul akar u na.

¹⁶Philchara Mosi khamaret atho u hatuka Aron Pathian suak anthiang.

¹⁷Hatuka phil akika Dathan avol hatuka Abiram le a inko ngai anphum.

¹⁸A ruaisi ngai chunga moi achula asiat ngai akang u.

¹⁹Sinai mual le rangkachak le seratte ramil abuak u hatuka amok u.

²⁰Pathian lianna serat chiak asak ramil le athul u.

²¹Anzok u Pathian a mangil u ha Aigupta na thotheina lian tak le anzok ha.

²²Sovan ituk tichangabui mo ei tho! Ituk tichangabui mo Tipui sen han!

²³Pathianin a mi ngai ansiat rang ati na a suak thang Mosi Pathian aduia anding a takasi arung amani ansiat rang ata.

²⁴Hatuka ram ahui ha aheng u, asik chu Pathian chongtin iam u mak.

²⁵A puanina a om u na achiar u Pathian he rangai u mak.

²⁶Hasik han a rakoka, philchar rama ei thi u rang.

²⁷Akhuk ngai iam lui ngai kara athek, mi rama athiranga aphal.

²⁸Hatuka Peora Pathian mi ngaiin Baal anmok ranga ava kop u, hatuka Pathian athi ngai matona dalin dar asak u.

²⁹Asiat ei tho u na Pathian tak ei mansi u, hatuka akar u na rikhua ei hong.

³⁰Tenchu Pinehas andinga asiat ngai a sinsaka hatuka rikhua abang.

³¹Hava sika han anthiang atia ama chu anril khuktin tenpeia rang.

³²Meriba tidunga PUMA tak amansi u amani sika Mosi ha anpon.

³³A tak amansi rei u na, andon luia chong aril.

³⁴Pathianin ha iamlui ngai that zit ro atia ei ti tho u mak.

³⁵Tenchu anom pui u na ha a om tho u ngai anchu u.

³⁶Pathian mi ngaiin ramil abiak u, hava ha ani ei siat u na.

³⁷A naipasal a nainupang u ngai Kanan pathian dalina adar u.

³⁸Asia asa relui naipang athat u na ha mi that sika ram chu annim.

³⁹A om tho u na aninga annim u.

⁴⁰Hasik han PUMA a mi ngai tak chunga atakasi a mumak u.

⁴¹Pathian iam lui ngai antor ranga apek, hatuka a raldui ngaiin alua u.

⁴²A raldui ngaiin a pengsom u a thuaia a om u.

⁴³Voi hozetmo PUMAN ami ngai a mazokam tenchu asel tit u, asiata anning riam u.

⁴⁴Hanum ni rase achap u le PUMAN arangai ei antak u na arangai.

⁴⁵Amani sika a chongtin mangil mak, a lungkham ei lian sika abang ret.

⁴⁶Ansinsak ngai lungkham a manmu.

⁴⁷Na mazok ro O PUMA, koini na Pathian, namtin kar ata na hong tuang ret ro na rai ei sana na raming anthiang nei manpakna rang.

⁴⁸PUMA manpak ro Israel Pathian ha; atun ata taituan tenpei manpak ro! Mi doran Amen! ti rase! PUMA manpak ro!