Read Ranglong SAM 109 Bible Online

SAM 109 - Ranglong bible

SAM 109

¹La ruaipu ran: David Anpakna La Ka na manpak nang o Pathian; daireka om no ro!

²Mi salui le milak athei ngaiin anan thopui u ka ruia milak atho u

³ka ruia asiat aril u asik abuia ana dui u.

⁴Amani ka ditam ni rase anan dui pui u amani rang bor ka zong zei.

⁵Asa rathul asia anapek u lungkham rathul mumak.

⁶Rui azek misiat athang tanla ka raldui ngai rui azek rang, hatuka a raldui khatin sinsak rase.

⁷A rui anrila dik lui anti rase a borzong ngal ha masial a nei anti rase.

⁸Ei dam hek len rase a sintho mi khatin lua rase!

⁹A nai ngai sakangcha ni u rase, a nungak arong ni rase.

¹⁰A nai ngaiin abui kutado ni u rase ei om u na khoram ata ankhai u rase.

¹¹A koma antang ngaiin aram lua u rase ei sua ngai khualin apot rase.

¹²Tuten lungkham mu no rase anuka sakangcha ei mak ngai um min tel no rase.

¹³A chi azam thi kiar rase khuk khat retin a raming mangil rase.

¹⁴A chi azam ngai masial PUMAN retit rase hatuka a nu masial madual no rase.

¹⁵PUMAN ei masial u ngai retit rase amani chu anngila om rase!

¹⁶Ha na sing ngai ti relui ha; anriang ngai, abui ngai, asan abui ngai ansinsaka athat!

¹⁷Mi, khomak asam zot ama khomak tung rase! Mi borsang tung rang zot mak min borsang pe no rase.

¹⁸Ei anliang anga aninga khomak le anliang; atak chunga akhomak anphum rase ti anga hatuka a runa sariak anga luang rase.

¹⁹Puan ansil anga atak chunga kop rase atak chunga kongkhit anga om rase!

²⁰PUMA ka raldui ngai hantin han sinsak rase ka tak chunga asiat aril ngai!

²¹Tenchu ninganei ka PUMA na chongtin anga na san ro, hatuka na lungkhamna ei sa sika na mazok ro.

²²Koi hi anriang le anang; ka malung ei anthuk tenpei ka duk ana.

²³Khuluia ramil anga anpei rang ka ni nukanei ang azuang rang ka ni zei.

²⁴Neksak kei nang sika ka mankhuk det mak; koi hi ite ni makung tenchu vun le ru.

²⁵Ka mi ngaiin ana mu le ana mani u, Ana mu u le alu athing u.

²⁶O PUMA, ka Pathian na san ro; na lungkham banglui sika na san ro.

²⁷Hava ha na kut keng atia ei riat thei u; PUMA nangin nei tho atia ei riat u theina rang.

²⁸Khomak na sam unti, nangin chu bor na pe na ti. Ei anthui ule maimok ansak unti, na suak chu arai san inti.

²⁹Ana dui ngai chu anzakna puan rasila om u rase ani, mipui bila ama chu manpak ka ti.

³⁰Ka mur le Puma kom raisanna achan ril ka ti, ani, mipui bila ama chu manpak ka ti.

³¹Anriang ngai tiang anding inti athat ruana rui ansat ngai ata azok ranga.