Read Ranglong SAM 119 Bible Online

SAM 119 - Ranglong bible

SAM 119

¹Lampuia mi sa anzui ngai chu borsang atung u, PUMA dan azi ngai chu.

²A chong manriat ngai azi ngai chu borsang atung u, malung taka anrok ngai chu.

³Amani han adik nok ngal tho u maka; a lampuia han kal achoi u chachak.

⁴Nei manchuna chong ngai chu chongpekna na peka taksat mara nei tel theina rang.

⁵O, na chongmansuk ngai atel ranga ka omdan ngai andeta lei om se la nu!

⁶Hantin han mualphui ansak no ning, na chongpek ngai dora ka poisak tik chu.

⁷Malung dik anputa pham chong na ril ka ti, na ruirilna adik ngai kan chu tik le chu.

⁸Na chongmansuk ngai tel ka tia; na ma pial no ro!

⁹Hontinmo ruatharin a omdan ei manthiang rang? Na chong anga a omdan ei manga.

¹⁰Ka malung dora le nang na haso andom rang ka tho na; na chongpek ngai amak ranga na phal no ro.

¹¹Na chunga kei masial nokna rang, na chong chu ka malunga manting ka ti.

¹²O PUMA, nang borsang na tung; na chongmansuk ngai na manchu ro.

¹³Na nera na ruiril asuak ngai dora chu ka mur le ka manriat zei.

¹⁴Na chong anriat lama chu ka rai asana neinungna ngai dora na ka raisan ang den.

¹⁵Nei na manchuna chong ngai chu mandon ka ti na; na lampui ngai ham poisak ka ti.

¹⁶Na chong mansuk chunga han pham ka ti na; na chong chu mangil no ning.

¹⁷Kei dam theina rang le na he kei tel theina rang, na suak chunga asa na tho ro.

¹⁸Na dan ata boidongom chongtak ngai kei mu theina rang ka mit na manvar pe ro.

¹⁹Phila hin khual ke ka ni; na chongpek ngai ka ranga thup no ro.

²⁰Kei damna hi akui chita a oma; na ruirilna ngai ei rangai chian sika.

²¹Mi omalian, khomak atung ngai ha, chunngo na tho na; na chongpek ngai tel lui ngai chu.

²²Anrilsiatna le anmumakna hi ka kom ata na khai pe ro na chongmansuk ngai ka tel hi le.

²³Mi lian ngai um ansut u na, ana ero u, tenchu na suakin na chongmansuk ngai hi ke ei mandon.

²⁴Na chongmansuk ngaiin phamna a na peka; huangvar ana sak ngai um ani.

²⁵Kei damna hi philvuta anlak tita; na chong anga na manhar ro.

²⁶Ka omdan ngai chu ka na mantheia, nangin nana masanga; ka chongmansuk ngai chu na manchu ro.

²⁷Nei na manchuna chu kei riat theina rang na san ro, hanke boidong sin nei tho ngai kei mandon rang.

²⁸Kei damna hi lunghang sika azoi chachak; na chong ang zela ratna na pe ro.

²⁹Om dan dik lui ka kom ata na khai pe tan la, na ruirilna ngaia ka malung ka peka.

³⁰Iamruana om rang ka thanga; na ruirilna ngaia ka malung ka peka.

³¹Anchuna neina pek ngai, ka tela; O PUMA, mualphui na mansak no ro.

³²Na chongpek ngai apham hiaia tel ka ti, riatna tampa neina pek rang sika.

³³O PUMA, na chong mansuk lam chu na manmu ro, hanke ahek tenpei kei ro rang.

³⁴Riat theina na pe ro, hanke kei tel rang; ka malung dora le tel ka ti.

³⁵Na chongpek tianga na manse ro, asik chu hava ngai han phamna kei man ke.

³⁶Na chong manriat ngai tiang han ka malung na manhoi pe ro huatanhamna tiang ni luia.

³⁷Ite nilui apapei ngai a en nok ranga ka mit na khai pe ro; na lampui tiang na manhar ro.

³⁸Na chong chu na suak koma hin mandet ro, hava ha nang anan chi ngai rang ani.

³⁹Mi rilsiatna kei achi hi na khai pe ro; na ruirilna ngai chu asa ake.

⁴⁰Enta, nei manchuna chong ngai chu ariat rang ka zota; nei dikna sika na manhar ro.

⁴¹O PUMA, lungkham neina muzia na manmu ro, asik chu na chong kei iam ke.

⁴²Hanke, ka siat arilpu kei masang thei rang asik chu na chong kei iam ke.

⁴³Chongtak chong chu ka bai ata na rasua pe kiar no ro, na ruirilna hi kei iam ke.

⁴⁴Na dan chu zom chian ka ti, kumkhua taituana.

⁴⁵Ana lua buia chei anleng ka ti, nei na manchuna chong ngai keia rok sika.

⁴⁶Na chong manriat ngai reng ngai koma ril ka ti na anzak no ning.

⁴⁷Hatuka, na chongpek, keia dit ngai chunga han kei pham rang.

⁴⁸Na chongpek keia dit ngai tiang han ka kut ngai phar ka ti na; na chong mansuk ngai chu mandon ka ti.

⁴⁹Na suak koma chongtin ha re tit ro; hiva hin iamna ana pek.

⁵⁰Hava ha kei antakna nam ka phukdaina ke hanum ni rase na dan ata ankhai makung.

⁵¹Borai athei ngai han achan maniero ana tho u na, hanum ni rase na dan ata ankhai makung.

⁵²O PUMA, tianlaia na ruiril ngai ha ka riat tita, lungngam kan sakna chachak.

⁵³Mi salui na dan ansiat ngai sika, taksitna na ka bit chachak.

⁵⁴Ka khual hongna ina hin na chongmansuk ngai chu ka la ke.

⁵⁵O PUMA, zana han na raming ka riat tita, na dan um ka zi chachak.

⁵⁶Hava ha ka dona nei na manchuna chong ngai kei tel sika.

⁵⁷PUMA chu ka changai ke; na chong atel ranga chong ka rila.

⁵⁸Ka malung dora le na lungkhamna azonga nei zot dan anga lungkham na mu ro.

⁵⁹Ka omdan ngai ka mandona, na chong manriatna tiang ka ke ka phet zeia.

⁶⁰Na chongpek ngai azi rang kan nota, sot makung.

⁶¹Mi salui ngai rirual ngai han ana vet u na, tenchu na dan mangil makung.

⁶²Zan chima phamna chong ana ril ranga anthui ka ti na ruiril adik ngai sika.

⁶³Nang anan chingai dora le, nei manchuna chong azi ngai lom ke ka ni.

⁶⁴O PUMA, leilung hi na lungkhamna le abit ke; na chongmansuk ngai chu na manchu ro.

⁶⁵O PUMA, na chong ang zela, nang na suak ka ranga na sa na.

⁶⁶Mandon theina le riatna na manchu ro, na chongpek ngai hi kei iam ke.

⁶⁷Ansinsaka ka om man han lam dik luia ka se chachaka, atun hin chu na chong ka tel zei.

⁶⁸Nang chu na sa, asam na tho na! Na chong mansuk ngai chu na manchu ro.

⁶⁹Mi omalian ngai han ka chunga milak asin u na, ka malung dora lehin nei na manchuna chong ngai chu.

⁷⁰Hiva mi ngaiin ite riat theina don u mak, koiin chu na dan chunga ka pham chachak.

⁷¹Na chong mansuk ngai chu kei anchu theina ranga, ansinsaka kei lei om ha ka rang asa ke.

⁷²Rangkachak le sumru sang tampa nek han na mura dan asuak ha ka rang asa bet ke.

⁷³Na kut le nana sina, nei na manding ke; na chongpek ngai chu kei anchu theina rang riat theina na pe ro.

⁷⁴Nang anan chi ngai han na mun tia, pham unti, na chong chu kei sabei chachak sika.

⁷⁵O PUMA, na ruiril ngai chu adik le, nang han aiamrua sabaka ke, neina sinsak ani ti ka riat.

⁷⁶Na suak koma na chongtin a anga, lungkham taka na lungkhamna chu ka phukdaina rang ni rase.

⁷⁷Kei dam theina rang na lungkhamna ngai ka koma hong rase na dan chu kei phamna ke.

⁷⁸Omalian ngai chu mualphui ansaka om rase; dik lui sabaka ei na mannuai sika, tenchu nei na manchuna chong ngai ha mandon ka ti.

⁷⁹Nang anan chi ngai chu ka tiang anhoi rase, hanke na chong manriat ngai chu ei riat u rang.

⁸⁰Mualphui kei ansak nokna rang ka malung hi na chongmansuk ngaia han sanzuia om rase.

⁸¹Kei damna hi na sandamna anngaia achuai zei; hanum nisela na chong ka sabei chachak.

⁸²Na chong athirna rang ka mit anvai sua zei, “Hotikmo nangin phuk nei na mandai rang?” ka ti chachaka.

⁸³Moikhun ei thut mevun kok ang kei lei nin zel; hanum na chong mansuk ngai chu mangil makunga.

⁸⁴Ni ituk asotmo kei la ngak rang? Anan sinsak ngai chunga hin itikmo rui nei ril rang?

⁸⁵Mi omalian; na dan anga om lui ngai han, kei chulna rang dip ahuat u na.

⁸⁶Na chongpek ngai dora chu aiamrua ke; amanin diklui sabaka ei na sinsak chachak hi!

⁸⁷Amani han phila hin ana tho vivit u na, tenchu nei na manchuna chong ngai chu nuksir son makung.

⁸⁸Na lungkhamna a anga na manhar ro, hanchu na mura chong manriat ngai chu tel ka ti.

⁸⁹O PUMA, kumkhuana rang; na chong chu anvana adet sabak a oma.

⁹⁰Iamrua nei ni na chu akhuk akhuka om inti; leilung hi na mandeta a om chian ke.

⁹¹Hava ngai ha avian hin na ruiril ngai anga a om chian u na, alom peia na suak kiar ani u na.

⁹²Na dan chu kei phamna ni no se la chu, kan tak lai han thi zei ka tia.

⁹³Nei na manchuna chong ngai chu mangil thak no ning, nangin hava han nana manhar zeia.

⁹⁴Na ta ke ka ni hi le, na sandam ro! nei na manchuna chong ngai chu keia rok ke.

⁹⁵Mi salui ngai han ana that ranga ana ngak u chachaka, tenchu na chong manriat ngai chu mandon ka ti.

⁹⁶Asa chongpek dora hekna chu ka mu zeia; na chongpek ngai chu alian anzui ke.

⁹⁷O, na dan hi ka dit ba! Sunsota kei mandon chachak ke.

⁹⁸Na chongpek ngai han ana dui ngai neka ahianna na ana sina kumkhuana ka koma nei om chachak sika.

⁹⁹Anan chupu ngai dora neka hianna ka don ual, na chong manriat ngai kei mandon chachak sika.

¹⁰⁰Atar ngai nek ten ka riat thei ual ke, nei na manchuna chong ngai kei tel sika.

¹⁰¹Na chong kei zom theina rang, lam saluia ka ke phet makung.

¹⁰²Na ruirilna ngai ata ankhai makung; nangin nei na manchu sika.

¹⁰³Na chong ngai hi athum ba nu Ka ranga khuaining neka athum ke!

¹⁰⁴Nei na manchuna chong ngai sika riat theina ka don chachak, hasika han omdan diklui ngai dora kei matir ke.

¹⁰⁵Na chong hi ka ke ngai rang lem ke ka lam ranga ra-ang ke.

¹⁰⁶Na ruirilna adik ngai chu azi rang chong ka tina ka mandeta.

¹⁰⁷Antak atiar sabaka ka oma; O PUMA, na chong ang zela na manhar ro.

¹⁰⁸O PUMA, lungkham taka ka baia nuampek ngai hi la tan la, na ruiril ngai ha na manchu ro.

¹⁰⁹Kei damna ka kuta a om chian chachaka; tenchu, na dan chu mangil ngai makung.

¹¹⁰Mi salui ngai han kei anokna rang chang akam u na, tenchu, nei na manchuna chong ngai chu mangal makung.

¹¹¹Na chong manriat ngai ha kumkhuana ka changaia ka laka; hava ngai han ka malung rai aman sana.

¹¹²Kumkhuana, a hek tenpei na chongmansuk ngai anga atho ranga ka malung ka manhoi.

¹¹³Mi amalung atam ngai chu ka matira, na dan hi chu ka dita.

¹¹⁴Nang chu kei anthupna mun le ka phocheng ke na ni; na chong kei sabei ke.

¹¹⁵Nangni asanok atho ngai, na ma u ro. Ka Pathian pek ngai kei vong rap theina rang.

¹¹⁶Kei dam theina ranga na chong ang zela ranak na pe ro; koi salui chunga hin anzaka na manom no ro!

¹¹⁷Na sur ro han chu zok ka tia, na chong mansuk ngai chu poisak chian ka ti.

¹¹⁸Na chong mansuk ngai tel lui ngai dora chu na matira; Ei huang u na chu milak ke.

¹¹⁹Phila mi salui ngai chu ranok anga na pei chachaka, hasik han na chong manchu ngai chu keia dit ke.

¹²⁰Ka taksa hi nang ei na chi sika annoka; na ruiril u ngai um ha ka chia.

¹²¹Rui ka rila, adika kei tho chachak ke; pengsom ana tho ngai ata na ma no ro!

¹²²Na suak chu asan ranga chongtin ro; borai atho ngai pengsoma na ma no ro!

¹²³Na sandamna kei thir chiana ka mit anthiang lai mak, na chongdik athir na nam.

¹²⁴Na lungkhamna sika na suak chu tho ro, na chongmansuk ngai chu na manchu ro.

¹²⁵Na suak ke ka ni, riat theina na pe ro, na chong manriat ngai chu kei riat theina rang.

¹²⁶PUMA, atho hun zei, na dan hi ite ni luia ei sin u sika.

¹²⁷Hasik han na chongpek ngai chu rangkachak neka keia dit ke, ani, rangkachak anthiang neka ke.

¹²⁸Hasik han lampui tina nei na manchu na chong ngai hi adika ka riat; omdan dik lui ngai dora hi kei matir ke.

¹²⁹Na chong manriat ngai hi boidong a om; ka rilru dora le ka zi chachak.

¹³⁰Na chongril nei manthianga han mi ngai ra-ang apeka mi mo ngai chu a manriat thei chachak.

¹³¹Ka bai ka anga, ka phuk ansama na chong pek ngai kei zot sika.

¹³²Ka tiang hong anhoi tan la, lungkham na mu ro, na raming andit ngai lungkham nei mu ang han.

¹³³Ka kal phet ngai hi na chonga mandet tan la; asanokin ka chunga ning nei no rase.

¹³⁴Miring pengsomna ata han na mazok ro, hanke nei na manchuna chong ngai kei zi rang.

¹³⁵Na mel le na suak hi na man el tan la na chong mansuk ngai chu na manchu ro.

¹³⁶Ka mitrathi hi tidung ti anga aluanga, na dan ei zi u nok sika.

¹³⁷O PUMA, nang chu na dika, na ruiril ngai um adik ke.

¹³⁸Na chong manriat ngai chu adik le aiamrua sabaka chong na peka.

¹³⁹Ka taksatna na ana pei zei, ana dui ngaiin na chong ei mangil u sika.

¹⁴⁰Na chong hi anthiang sabak ke! Hasika han na suak hin eia dit ke.

¹⁴¹Mi sin le min ei na elsel ke ka ni, tenchu nei na manchuna chong ngai hi mangil ngai makung.

¹⁴²Nei dikna chu kumkhua dikna ke, na dan um chongtak ke.

¹⁴³Anponna le ratha takna na ka bita, hanum nisela na chongpek ngai hi kei phamna ke.

¹⁴⁴Na chong manriat ngai chu kumkhuana rang adik ke; riat theina na pe ro, hanke kei dam chian rang.

¹⁴⁵Ka malung dora le ka na paia; O PUMA, na masang ro.

¹⁴⁶Ka na paia; na sandam ro; hanchu na chong manriat ngai tel ka tia.

¹⁴⁷Khuansal man ka na pai chachaka; na chong ngai chu ka sabei chachak.

¹⁴⁸Na chong kei mandon theina rang, ka mit ngai hi zan khakhat ameng ke.

¹⁴⁹Na lungkhamna anga ka he hi rangai tan la; O PUMA, na ruirilna ngai anga na manhar ro!

¹⁵⁰Mandonna salui azi ngai han ana hong dep u na, amani na dan ata alapa na om u ke.

¹⁵¹O PUMA, nang chu na naia, na chongpek ngai dora chu chongtak ke.

¹⁵²Tianlai, na chong manriat ngai ata; hava ha kumkhuana rang na mandet ti ka riat zei.

¹⁵³Kei antakzia mandon tan la, na mazok ro, na dan chu mangil ngai makung.

¹⁵⁴Ka rui na ril pui tan, na ratan ro; na chong anga na manhar ro.

¹⁵⁵Sandamna chu mi salui ngai ranga ala ke, na chong mansuk ngai chu eia rok u nok sika.

¹⁵⁶O PUMA, na lungkhamna chu alian ke; na ruirilna ngai anga na manhar ro!

¹⁵⁷Anan sinsak ngai le ana dui ngai chu atampa u ke, hanum nisela na chong manriat ngai chu ma makung.

¹⁵⁸Phuazekam ngai chu ka ena, ka takasi na, na chong ei tel u nok sika.

¹⁵⁹Nei na manchuna rui ngai keia ditzia hi mandon tan la. O PUMA, na lungkhamna sika na manhar ro!

¹⁶⁰Na chong anchu chu chongtak ke, na ruirilna adik ngai doram kumkhuana om chian inti.

¹⁶¹Mi lian ngaiin ite asik abuia ana sinsak u na, hanum nisela ka malung han na chong ngai ke ei achi.

¹⁶²Na chonga hin ka rai asan ke Donglua atampa amupu anga.

¹⁶³Milak hi ka mumaka ka matira, na dan hi chu ka dit ke.

¹⁶⁴Nikhat avoi sari ka na manpak chachaka na ruiril ngai ei dik sika.

¹⁶⁵Na dan andit ngai han chu phukdaina tampa adon u, iten man ba thei u mak.

¹⁶⁶O PUMA, na sandamna kei sabei chian ke, na chongpek ngai anga ka tho chachak.

¹⁶⁷Kei damnan na chong manriat ngai atel chachaka; kei adit sabak ke.

¹⁶⁸Nei na manchuna chong ngai le na chong manriat ngai chu ka tel chachaka; ka omdan ngai dora hi na makunga om ke.

¹⁶⁹O PUMA, kei na paina he hi na makung hong tung rase! na chong anga riat theina na pe ro.

¹⁷⁰Lungkham kei zongna hi na makunga tung rase, na chong anga na sandam ro!

¹⁷¹Ka murin anpakna chong ril ra se, nangin na chong ruat ngai chu nei na manchu chachak.

¹⁷²Ka malei hi na chong anpaka la tho rase, na chongpek ngai dora chu dikna ei ni sika.

¹⁷³Na kut chu ana san rang ansin diama om rase, nei na manchuna chong ngai chu kei athang sika.

¹⁷⁴O PUMA, na sandamna chu ka zot chachaka! na dan chu kei phamna ani.

¹⁷⁵Kei damna hi dam rase, han chu na manpak inti; na ruirilna ngaiin um na san rase.

¹⁷⁶Bera anpei anga kan peia, na suak hi arok ro; na chongpek ngai chu mangil ngai makung.