Read Ranglong SAM 135 Bible Online

SAM 135 - Ranglong bible

SAM 135

¹PUMA chu manpak u ro! PUMA raming chu manpak u tan la. O PUMA, suak ngai ama chu manpak u ro.

²Nangni PUMA ina anding ngai, Pathian zahual sung kholaia anding ngai.

³Nangni PUMA ina anding ngai; a raming anpaka la tho u ro; ahui ke.

⁴PUMA han Jakob ngai chu ama rang ei athang ke, Israel ngai hi adonglua bik ranga eia thang ke.

⁵PUMA chu alian ani ti le, koini na PUMA chu Pathian atatei neka chungnung ani ti, kei riat ke.

⁶PUMA han ei zozot atho chachaka anvan le phila, tipuiliana, ti anthukpa ngai doram.

⁷Ama han ansum ngai kolmong ngai ata amakhal chachaka; khuanlek ngai um rua rang asin chachaka, adonglua in ngai ata han thinthi amasuak chachak.

⁸Ama han Aigupta rama nai rapa ngai athata miring le mi ngai um.

⁹O Aigupta ram, ama han sinsiana ngai le changdong a om ngai asunga na hong tira, Pharo achunga le asuak ngai dora chunga han.

¹⁰Ama han nam atampa athata, reng alianpa ngai athata.

¹¹Sihon, Amor ngai reng le, Oga, Basan ram reng le, Kanan rama mi dora chu.

¹²A ram u chu achangai rang apeka; ami Israel ngai changai rang.

¹³O PUMA, na raming chu kumkhuana om intia; O PUMA, nang ariattitna chu khuk a om sunga chu om inti.

¹⁴PUMA han ami ngai chu ruiril pe inti; asuak ngai ruia han chu amalung makhir intia.

¹⁵Namtin miramil ngai chu sumru le rangkachak ani u na, miring kut suak ani u.

¹⁶Mur ngai adon u na chong thei u mak, mit ngai adon u na, muthei u mak.

¹⁷Kuar ngai adon u na rethei u mak; abai u na han phuk ngal san u mak.

¹⁸Hava abuak ngai chu amani ang han om unti; hava aiam ngai doram!

¹⁹O Israel sung ngai PUMA chu manpak u ro. O Aron sung ngai PUMA chu manpak u ro.

²⁰O Levi sung ngai PUMA chu manpak u ro; PUMA anchi ngai PUMA chu manpak u ro!

²¹PUMA Zion ata anpaka a om rase, Jerusalema a om ha. PUMA chu manpak u ro!