Read Ranglong SAM 136 Bible Online

SAM 136 - Ranglong bible

SAM 136

¹O PUMA, koma raisan chong ril u ro ama chu asa ke, a lungkham nam kumkhuana om inti.

²O, Pathian ngai Pathian koma han raisan chongril u ro, a lungkhamna chu kumkhuana om inti.

³O, PUMA ngai PUMA koma raisan chong ril u ro; a lungkhamna chu kumkhuana om inti.

⁴Ama atheia boidongom alianpa atho chachak koma han; a lungkhamna chu kumkhuana om inti.

⁵Hianna le anvan asinpu koma han; a lungkhamna chu kumkhuana om inti.

⁶Phil hi ti chunga asiak zuakpu koma han; a lungkhamna chu kumkhuana om inti.

⁷Ra-ang alianpa asinpu; a lungkhamna chu kumkhuana om inti.

⁸Ni, suna rui aril rang; a lungkhamna chu kumkhuana om inti.

⁹Tha le arasi ngai, zana ruirilpu ranga asinpu koma han; a lungkhamna chu kumkhuana om inti.

¹⁰Kut arat le ban aphara; a lungkhamna chu kumkhuana om inti.

¹¹Aigupta ngai nai rapa athat pe na; a lungkhamna chu kumkhuana om inti.

¹²Amani bil ata Israel ngai hong anzoka aruaipu koma han; a lungkhamna chu kumkhuana om inti.

¹³Tipui sen asen poka; a lungkhamna chu kumkhuana om inti.

¹⁴Israel ngai alai taka ankanpu; a lungkhamna chu kumkhuana om inti.

¹⁵Pharo le a sipai ngai ha chu Tipui sena athatpu koma han; a lungkhamna chu kumkhuana om inti.

¹⁶A mi ngai philchara aruaipu koma han.

¹⁷Reng alian tatak ngai athat athata; a lungkhamna chu kumkhuana om inti.

¹⁸Reng raming anthang tatak; a lungkhamna chu kumkhuana om inti.

¹⁹Sihon, Amor ngai reng le; a lungkhamna chu kumkhuana om inti.

²⁰Oga, Basan ram reng ngai athata; a lungkhamna chu kumkhuana om inti.

²¹Amani ram changaia; a lungkhamna chu kumkhuana om inti.

²²A suak Israel ram changai apekpu koma han; a lungkhamna chu kumkhuana om inti.

²³Ama han koini na nam annuai laia ana riattita; a lungkhamna chu kumkhuana om inti.

²⁴Ana dui ngai ata anan azoka; a lungkhamna chu kumkhuana om inti.

²⁵Ama han nukanei dora koma sak apek chachak; a lungkhamna chu kumkhuana om inti.

²⁶O, anvan Pathian koma han raisan chong ril u ro; a lungkhamna chu kumkhuana om inti.