Read Ranglong SAM 18 Bible Online

SAM 18 - Ranglong bible

SAM 18

²PUMA chu ka lungpui le, ka rakulpui le; ka Pathian, ka lungpui adet ani na, amana han anboi ka ti. Ka phocheng le, ka sandamna raki le, ka rakul ansang ani.

³Anpak rua PUMA chu kui ka tia, hankeng ana dui ngai ata sandama om ka ti!

⁴Thina rirual ngaiin ana khera; Pathian poisak luina tilian ngaiin ka ratha manta na.

⁵Seol rirual ngai han ana khitam, thina chang ngaiin ana manoka.

⁶Ka rathata sika PUMA chu ka kui chachaka; ka Pathian ka pai chachak. Ama han a biakin ata han ka he ariata; amatona kei paina rasa chu a kuara a luta.

⁷Hava suale phil hi annika, annok zeia; atak ei si sika tang ngai um ha arabul tenpei annika, annok zeia.

⁸A nar ata chu moikhu asuak zu zuta, a bai ata asuak moi han akang zu zuak zeia, hava han moirahol um aman al luluaia.

⁹Ama han anvan ngai ngal a manbu na, a chum zeia; a ke thuaia han azing ansapa hi alei oma.

¹⁰Cherub chunga a chuanga, a zuang zeia, thinthi mantha han a honga zuanga.

¹¹Azing hi ei anthupna muna ama ei anhualna chu buktea asina; tina, azingna, anvana ansum ansamup ngai chu.

¹²A matona ei elna sika han ansum ansamup ngai chu alena, arial ngai le moiraek ngai achul phu phura.

¹³PUMA chu anvana son rasa don ruruma, chungkhita han a he a rasua na; arial ngai le moiraek ngai achul phu phura.

¹⁴Hanuk, a thal ngai chu a kapa, amani ngai chu a manchena; khua a manlek zuzur chiana, a manpon chu chuaka.

¹⁵Hava suale, O PUMA, chunngo nei tho sika, na nara thinthi suak han ei sem sabak sika, ti luang ngai chu ahong anlanga, leilung rakul ngai chu hong anlang kiar zeia.

¹⁶Aman chu chung tiang ata ana honga bana ana sura; ti tampa ata ana nuka.

¹⁷Ana duipu aratpa ata han nana sana, anan mumak ngai atam; koi ka rang arat sabak u keng.

¹⁸Amanin chu ka ravan aduai ni han anan thopui u na, hanum nisela PUMA chu ana san ke.

¹⁹Ama han mun alian huaia ana ruaia; ka chunga ei pham sika ana lei sana.

²⁰PUMA han kei dikzia angngeta ka chunga atho na; ka kut ngai ei anthiang zia anga ana thuana.

²¹PUMA lampui ngai chu ka ro na; ka Pathian kom ata asia thona ma ngai makung.

²²A ruirilna ngai dora ka matona a om chachaka; a chongpek ngai chu pei ngai makunga.

²³Ama ranga chu baiankham rua om makunga, kei siatna ata ka theia kan heng chachaka.

²⁴Hasik han PUMA han kei dik a anga a na lei thuana, ka kut ngai a mit muna ei anthiang a anga.

²⁵Mi lungkham a muthei koma han lungkham a mu thei anga anlang ro; mi asa anzui ngai koma han asa anzui a anlang ro.

²⁶Mi anthiang ngai koma han anthianga anlang ro, hanuk mi ruang ankhir koma han ruang ankhira anlang ro.

²⁷Antak atiar mi ngai chu sandam ro, mi borai ngai chu hong mannuai ro.

²⁸Nangin ka lem nana manchuang pe na; PUMA ka Pathian han kei zingna na manvar pe inti.

²⁹Nangin nei na sana ral maton ka pana; ka Pathian sanna den le rakul bang kei len.

³⁰Pathian chu, a lampui chu asa anzui ke; PUMA chong chu ansin sua zei! Amana iamna a don ngai dora rang han ama chu phocheng ke.

³¹PUMA nok chu tumo Pathian a om? Koini Pathian nok chu tumo lungpui a om?

³²Ratna le ka konga ana khitpu le, ka mun ansangpa na ana manom pe chachaka.

³³Ama han ka ke chu azukpui ke anga ana sin pe na; ka mun ansangpa na ana manom pe chachaka.

³⁴Ka kut ngai hi ral a kap ranga a manchu chachaka, hasik han ka ban ngai dar saili ngal a rakuai theia.

³⁵Nangin na sandamna phocheng um nana peka; na chang kut le nana sura, nei annuaina sika miliana nana sin.

³⁶Ka thuai ka kal phetna chu nana manlian pe na, hava suale ka ke pher sial mak.

³⁷Ka raldui ngai razul u ka tia, huam u ka ti; anpeiphat u maseng chu anhoia hong kir lai no ning.

³⁸Ei anthuiret thei lai nokna ranga a muai chit u ka ti; ka ke thuaia hin hong anbok unti.

³⁹Nangin anduina ranga han ratna le ka konga nana khit pe; Anan duipui ngai chu ka ningneina thuaia na hong sika.

⁴⁰Anan mumak ngai chu kei masiat biang thei u na rang; nangin ana dui ngai chu nuksir nana manson zeia.

⁴¹Amani chu ankhek u na, tenchu a hong anzok u rang tute om u mak. PUMA nget ham a khek u na, tenchu masang maka.

⁴²Hava suale philvut thinthin ei leng anga han ka razik chit u na; kholai dialdok anga han a panga ka peia.

⁴³Nangin mi ngai ei sa u nok ata nana runga; namtin luna nana sina; kei riat nok mi ngai han ka haso adom unti.

⁴⁴Ka thang ei riat u le ka chong zom untia; khual ngai chu ka ningneina thuaia om unti.

⁴⁵Khual ngai chu a ratha anvai unti, a rakula ata han annok chunga hong suak unti.

⁴⁶PUMA chu a dam ke; ka lungpui chu anpaka om sela; anan sandampu Pathian chu anpaka om rase.

⁴⁷Phuba ana lak pe le; mitin ka ningneina athuaia ana siak pe Pathian nget ha.

⁴⁸Ama han ana dui ngai ata ana mazoka, ani, nangin ana dui ngai chunga nana siaka. mi lektak abui ata nana san chachaka.

⁴⁹Havasik han, O PUMA, namtin bila han raisan chong na ril ka tia; na raming anpakam la tho ka ti.

⁵⁰Ama han sandamna lian a reng sin ngai koma a pek chachaka; a sariak manthi chunga, David le akhuk ngai chung ngeta han, kumkhuana a lungkham don zia manlang inti.