Read Ranglong SAM 19 Bible Online

SAM 19 - Ranglong bible

SAM 19

¹La ruaipu rang: David Anpakna La Anvan ngaiin Pathian ei lianzia chu apuanga! Boruak alianpan a kutsuak a manlang!

²Sunin sun koma chong a ril zela; zanin zan koma riatna a ril zela.

³Chong aril le a chong ngal om maka, a he u chu kuara riat thei nimak;

⁴ei mai u na ri chu ramual pumpuia asipa a oma; a chong u chu kolkung tenpeia asip sua zei. Amani bila ani rang puanin khat a sin u na;

⁵ha ani ha inanei rangpu a tadan ata asuak anga ani na, mi ratpa anga ei tana lampuia atan rang chu apham chachak.

⁶Ei hong suakna chu kolmong ata ani na; ei tana ei anlimna chu sontiang ei hekna ten ani alum re luia anthup thei ngal om mak.

⁷PUMA dan chu asa kip ke; damna a manthar chachak. PUMA chongpek chu anthiang ke, mit ngai a manvar chachak.

⁸PUMA manchuna chu adik ke, malung rai a mansan chachak. PUMA chongpek chu anthiang ke, mit a manvar chachak.

⁹PUMA anchi chu saina ke, kumkhuana a om chachak; PUMA ruiril ngai chu atak ke, a dik kiar ke.

¹⁰Hava ha rangkachak neka anditrua ual ke, ani rangkachak anthiang atampa nekam, khuaining le khuaithar neka athum ual ke.

¹¹Hava ngai lehan na suak chu anchuna ka om chachaka; hava a zom chu ratpak atampa a manna ani chachak.

¹²Tumo aninga ei masial ngai ariat thei? Asiat anthup ngai ata hin na rathial ro.

¹³Ariat uama asiat atho nok ranga na suak hi na sur tit ro; hava ngaiin ka chunga ningnei no sela. Hankeng asa kipa om ka tia; Masial alianpa ata anthianga kei om thei rang.

¹⁴O PUMA, ka lungpui le anan ratanpu, ka baia chong asuak ngai le ka malunga kei mandonna ngai hi na mit muna phamrua na om rase!