Read Ranglong SAM 22 Bible Online

SAM 22 - Ranglong bible

SAM 22

¹La ruaipu rang: David Anpakna La Ka Pathian, ka Pathian, ichangamo nei na mak? Ana san ranga ichangamo alapana nei om, kei ankuina he ata alapana nei om?

²O ka Pathian, suna kan kheka, tenchu na masang mak che; zanam kan khek, dairek makung.

³Tenchu, o nang Israel ngai anpaknana a om chachak, nang chu anthiang ke na ni.

⁴Na khuk ngai han ana lei iam u na; ana iam u na, hanke nangin na lei san chachak.

⁵Ana pai u na, hanke sandama ei lei om u chachak; ana iam u na, hanke mualphui ansaka om u ngai mak.

⁶Koi hi chu miring ngal nimakunga, anchal ke ka ni; Miring ngai rilsiat le min eina matir ke ka ni!

⁷Ana mu doran maniero ana tho u; a mur amalip u na, a lu avik u.

⁸“PUMA chunga anbetok ro, aman ama chu mazok rase, a chunga ei pham sika ama ha mazok rase” ati u na.

⁹Nang ke tekok ata anan suakpu na ni, ka nu ranu ka nek lai ata han nangin kei iamna nana sin pe.

¹⁰Tekok len ata nang na chunga anbetok ka ni na, nang chu ka nu vonsung len ata ka Pathian na ni.

¹¹Koi ata a lana om no ro! antakna anai ke, ana san rang ngal om mak.

¹²Serattang atampan ana huala; Basan ransa serattang arat ngaiin ana hual u na.

¹³Akoibaknei a mur u le ana ngo u na.

¹⁴Ti anga anleia ka oma, ka ru ngai doram a ralo anzom maka; ka malung hi khuailiang angke; ka ril bila azoi zeia.

¹⁵Ka ranak hi bel anga achar zei ka malei um ka adanga akop tita, nangin thina philvuta nei na manlut ke ani zei.

¹⁶Ui ngaiin ana hual u na; asanok atho anchun ngai han ana hual tit u na; ka kut le ka ke ngai ana ver pe u.

¹⁷Ka ru dora hi ka tel theia; amani chu anhoia ana en chian u na.

¹⁸Ka raliang ansem u na, ka kultai rang ravan enna atho u na.

¹⁹Nangin chu, O PUMA, koi ata alapana om no ro! O, anan ratpu, ana san rang annot ro!

²⁰Kei damna hi khendai ata na mazok tan la; kei don selep (ratha) hi ui ngai sinthotheina ata na mazok ro.

²¹Akoibaknei baikua ata na sandam ro; ani, satetang raki ata nangin nana hong masanga.

²²Ka unai ngai koma na raming ril ka tia; ankhom ngai bila han na manpak ka ti.

²³“PUMA anchi ngai, ama chu manpak u ro! Jakob akhuk ngai dora, ama chu manpak u ro! Israel akhuk ngai dora ama chu achi u ro!

²⁴Aman chu antak atuarpu antakna chu mumak maka, matir um mak; a mai um ama koma thup mak, ama kom achapten a rangai pea.”

²⁵Ankhomna lianpana kei na manpak chachakna hi nang na koma ani na; ama anchi ngai matona han ka chongtin len ka ti.

²⁶Omannuai ngai han neksak untia, khop unti; ama anrok ngai han PUMA chu manpak unti. Na malung u chu kumkhuana dama om rase!

²⁷Kolmonga mi doran um re ret unti, PUMA lam anhoi untia, namtina chitin na matona anbok unti.

²⁸Ram chu PUMA ta ani na, namtin chunga ruirilpu ani.

²⁹Phila anei anung ngai dora han nek sak untia a mok unti. atheia ei damna mandam thei lui chu.

³⁰Thuithar ngaiin a haso a dom untia; thuithar ahonga om zel ngai koma han PUMA thang chu ril unti.

³¹“PUMAN a mi ngai a mazok,” ti na alan zir rang ngaiin ril unti.