Read Ranglong SAM 28 Bible Online

SAM 28 - Ranglong bible

SAM 28

¹David a ta O PUMA, ka na pai hi. Ka lungpui na kuar na man set pe no ro! Nang nana daipe rek aniten chu, khur anthukpana achum anga lei om ka ti.

²Ka na paia ka kut ngai hi nang anmokna mun anthiang tiang kei phar han, lungkham kei zongna he ngai hi na rangai pe ro.

³Mi salui ngai bila le asiat atho ngai bila han na nuka na ruai no ro.

⁴A sintho u ang zel le, a sintho u ngai ei masial u ang zela thuan ro, akuta ei tho u ang zela thuan ro; ei siat u na manmu ro.

⁵PUMA sintho ngai le A kuta a sintho chu ei tel u nok sika; ama han amani ngai chu sin ret no nia masiat inti.

⁶Lungkham kei zongna he ngai ei rangai sika; PUMA chu anpaka om rase.

⁷PUMA chu kei ratna le ka phocheng ani na; ka malungin ama chu a iama, hanke ansana kei om. Hava sika ka malung hi rai asan sabaka; ka la le ama ka manpaka.

⁸PUMA chu ei rat u na ani na; sariak ei manthi rang han chu Sandampu rakula ani.

⁹Na mi ngai sandam ro, na donglua chang ha borsang pe ro. Amani ngai enzon tan la, kumkhuana pom ro.