Read Ranglong SAM 29 Bible Online

SAM 29 - Ranglong bible

SAM 29

¹David Anpakna La O Sin atho thei tak nai ngai, PUMA koma pe u tan; PUMA koma han anlianna le ratna pe u ro.

²PUMA koma a raming anlianna chu pe u tan; anthiang satna le anlianga PUMA chu amok u ro.

³PUMA he rasa chu ti chunga a oma; anlianna Pathian chu hongan ri ruruma, PUMA nget chu ti tampa chunga rasa hong dona.

⁴PUMA he chu sinathothei tak ani na, PUMA he chu anlian ke.

⁵PUMA he han sidar thing ngai makhiak intia, PUMA han Lebanon muala sidar thing ngai chu abong abui a manchanga.

⁶Seratte andai anga a manlama Lebanon le Sirion muala ngai sial a te anga.

⁷PUMA he han moi an al ngai chu achena.

⁸PUMA he han philchar a mantir chachaka; PUMA han Kades philchar ha a mannik chachaka.

⁹PUMA he han a zukpui te masul chachaka; ramchang thing na ngai chu a mankol hur chachaka.

¹⁰PUMA chu tiliansang lai han renga ansuta; PUMA chu kumkhuana rang renga ansuta.

¹¹PUMA han a mi ngai koma ratna pe intia, PUMA han a mi ngai chu phukdaina le borsang pe inti.