Read Ranglong SAM 31 Bible Online

SAM 31 - Ranglong bible

SAM 31

¹La ruaipu rang: David Anpakna La O PUMA, nanga han ka nan ngam chachaka; mualphui ansaka na siak no ro. Nei dikna sika na mazok ro!

²Ka tiang hin na kuar hong sung tan! Na mazok len ro! ka rang lungpui det tak; anan Sandam ranga zokna in lei ni ro.

³Nang chu ka lungpui le ka rakulpui na ni na; nang na raming sika na maruaia na man se ro.

⁴Kei anokna ranga maruka len ei pha u ata hin na mazok ro; nang chu ka rakulbing ke na ni.

⁵Na kuta ka ratha ka na mandona. O PUMA, chongtak Pathian; nangin nana ratan zei.

⁶Ite ni lui anpoisak ngai chu ka matira, koiin chu PUMA ke kei iam.

⁷Na lungkhamna sika hin kei phama ka raisan inti; ka lunghangna hi na mu chachak; kei damna hi antak laiam na riat chachak.

⁸Hanuk, ana dui ngai kuta nangin na khum mak che na; ka ke hi mun aliana nana siak pe na.

⁹O PUMA, lungkham na mu ro, lunghanga om ka ni; ka mit hi ka lunghangna sika aduai tir ke ani zei; kei damna le ka taksa nam.

¹⁰Ka damsung hi lunghangna na ahek zeia, ka kum ngai hi anhum duaia ahek zei. Kei masial sika ka ranak um achuai zei; ka ru ngai um achar sua zei.

¹¹Ana dui ngai sika ka raming him asiat zei, ka kho mi ngai sika asiat sabak ke ni zei, ka melriat ngai rangam anchi ruai ke ka ni zei; Kholaia mi ana mu ngai um ana rot pe zit u.

¹²A thi ei mangil u anga anngila ka om zei; bel akui ang ke ka ni zei.

¹³Mi tampan ei na sukna ka riata; ka ravela anchirua a om chu. kei chulna rang ana tho u lai han, kei damna ana lak pe rang atho u na.

¹⁴Tenchu, O PUMA, ka na iama; “Ka Pathian na ni,” ka ti a.

¹⁵Ka hun ngai chu na kuta a oma; ana dui ngai kut ata le, anan sinsak ngai ata na mazok ro.

¹⁶Na mel le na suak hi hong el tan la; na lungkhamna sika na sandam ro.

¹⁷O PUMA, mualphui ansaka na manom no ro; asik chu ka na pai hi. Mi salui ngai chu mualphui ansaka om sela; Seol-a daireka om rase.

¹⁸Milak athei mur chu chong thei luia om rase; hava ngai han omlian le elsel chunga chongalian pangai le mi dik ngai ero u chachak.

¹⁹O, nei satna nang anan chi ngai ranga nei manting chu, alian ba nu! Miring nai ngai mit muna nang anan boi ngai ranga nei tho pe chu.

²⁰Amani chu miringin anchaina rang ei tho u ata nei mazok na mit muna thup na ti. Malei le ankhal zotna ata han na chubuktena maruka siak na ti.

²¹PUMA chu anpaka om rase! A lungkhamna boidong om chu khopui adeta ana manmu na.

²²Koi ret chu tong kei anmo sika, “Na mit makung ata anpeia ka om zei” ka lei tia, tenchu keina pai han lungkham kei zongna he ha nei lei riata.

²³O, a mi anthiang ngai dora, PUMA chu adit u ro. PUMA han iamruana om ngai chu a runga, omaliana atho ngai chu asadima a thuan chachak.

²⁴PUMA ansabei ngai dora, arata om u tan la, na salung man rang u ro.