Read Ranglong SAM 33 Bible Online

SAM 33 - Ranglong bible

SAM 33

¹O, mi dik ngai, PUMA na han raisan la tho u ro; mi dik rang chu Pathian hi ei manpak rang ngal ke.

²Tingtang le PUMA koma han raisan chong ril u ro, chongpereng ri som adon le ama anpaka la tho u ro.

³A ma anpakna la thar tho u tan la, rahu dona athei sabaka tum u ro!

⁴PUMA chong chu adika, a sintho ngai dora chu aiamruana antho ke.

⁵Dikna le ruirilna dik hi a dita; leilung hi PUMA lungkhamna na abit ke.

⁶PUMA chong le anvan ngai ansin ani na, havana a om ngai doram abaia phuksan le ansin ke.

⁷Ama han tipuilian ti ngai chu a mankhoma; ti anthuk ngai chu asiakna ina a mankhoma.

⁸Leilung alua ngai doran PUMA chu achi sela! Ramuala a om ngai dora chu ama anchina om rase!

⁹Ama han a rila, a honga om zeia; chong apeka, adeta alei hong oma.

¹⁰PUMAN namtin ruizek chu ite niluia a manchanga; mitin mandonna chu ite lamluana buia asina.

¹¹PUMA ruizek chu kumkhuana om intia; a malunga a mandonna ngai chu akhuk abana tenpeia om inti.

¹²PUMA a Pathiana a don nam chu borsang atung u; ama a dongluana anthang mi ngai chu.

¹³PUMA han anvan ata ahong thira, miring nai ngai dora hi a mu chachaka.

¹⁴Phila a om ngai dora hi ei omna mun ata a hong thir chachak.

¹⁵A lom u na a malung asin chachak a sintho u ngai dora andon chachakpu han.

¹⁶Reng ngai reng hi sipai ngai ei tam duai sika sandama a om om ngai mak; mi rat hi ei rat sabak duai sika azok ni u ngai mak.

¹⁷Sakor hi ansandamna rang ite nimak; ei rat sabak duai sika tutem mazok thei no ni.

¹⁸En ro, PUMA mit chu ama anchi ngai chunga ke ei om chachak, a lungkhamna ansabei ngai chunga han.

¹⁹Ei dam u na thina ata anzok rang le; nidan achula amani andam rang.

²⁰Nei damnan PUMA chu a ngak chiana; ama chu ana sanpu le koini na phocheng ani.

²¹Amana han koini na malung raisan intia; a raming anthiang koinin nei iam sika.

²²O PUMA, na lungkhamna chu koini chunga om rase, nei na sabei ang zela.