Read Ranglong SAM 34 Bible Online

SAM 34 - Ranglong bible

SAM 34

¹David ei phua Ka hun dora na PUMA chu manpak ka ti na; ama anpakna chu ka mura suak babang inti.

²Kei dam nan PUMA chu manlian intia; omannuai ngai han hava ha re untia, pham unti.

³O, PUMA chu na manpak pui u tan la; a raming chu manpak u rei!

⁴PUMA chu ka roka, hanuk ama han ana masanga; keia chi ngai dora ata han ana mazok zeia.

⁵Ama a en u na, alei el zeia; a raldui ngai chu anzak ngal u no ni.

⁶Hiva mi lungkham aruai hi ankheka, hanuk, PUMAN alei riata; antakna ngai dora na han asan zeia.

⁷Ama anchi ngai chu aravel u na PUMA vanpalai han a ompuia, amazok chachak.

⁸O PUMA, ei sazia chu tem u ta. PUMA anbetok mi chu borsang tung unti.

⁹O, a mi anthiang ngai, PUMA chu achi u ro; ama anchi rang ngai han ite ansamna don no ni.

¹⁰Akoibaknei vanglai ngai chu ansama avon ancham unti na, PUMA anrok ngai chu asa ite ansam u no ni.

¹¹Hong u ro, naipang ngai, ka chong rangai u ro, PUMA anchi dan na lei manchu u ka ti.

¹²Satna ei mu theina ranga, damna andita asot adam azot chu tumo?

¹³Na malei chu asiat ata rung tan la, na mur chu anhuangna chong aril nok ranga rung ro.

¹⁴Asa nok matan la, asa tho ro; anngoina arok tan, zom zel ro.

¹⁵PUMA mit chu mi dik ngai tiang a en chachaka, a kuar le ei ankhek u na he a rangai chachak.

¹⁶PUMA mel han asiat atho ngai chu adui chachak, amani riattitna chu phil ata ei pei na rang.

¹⁷Mi dik ngai chu ankhek u na, hanuk, PUMAN alei riata; Ei anpon u na ngai dora na a mazok zeia.

¹⁸PUMA han amalung ana ngai chu ava nai chachaka; rilrua ansir ngai dora chu a sandam chachak.

¹⁹Mi dik antakna ngai chu atama, tenchu PUMAN hava ngai dora na a mazok chachak.

²⁰A ru ngai dora a vong rapa; angkhat ngal kiak maka.

²¹Asanokin mi salui ngai chu that inti na; mi dik anmumak ngai chu siatanlona om unti.

²²PUMA han asuak ngai damna aratan chachaka; ama na anbetok ngai chu angkhat ngal siat anlo u no ni.