Read Ranglong SAM 37 Bible Online

SAM 37 - Ranglong bible

SAM 37

¹David Anpakna La Asanok atho ngai sika na malung manngui no ro; dik lui taka atho ngai chu ningol no ro.

²Chiak anga achar len rang ke; chiak ring anga ala them rang ke.

³Puma na anngam tan, asa tho ro; hia rama hin om tan aiamruana om zel ro.

⁴PUMA chunga han rai mansan ro, hanchu, na malung zot ngai chu na pe inti.

⁵Na omdan rang chu PUMA chunga betok tan; ama chu iam tan, aman tho zit inti.

⁶Nei dik zia chu ra-ang anga na masuak pe inti; sat nei anlo ziam sun chimrip anga.

⁷PUMA na pongansa tan, ama chu ngak zazam ro; a omdana van asa anlopu sika na malung manngui no ro,

⁸Malung alum hi bang tan, taksit hi mong ro; na malung manngui no ro asiat atho rang na ruai inti.

⁹Asa nok atho ngai chu anpeia la om inti na, PUMA angak ngai chu ram hi la lua unti.

¹⁰Hun sot luite suana mi salui chu omlai no ni; ei omna mun chu na en na en am, om lai no ni;

¹¹omannuai ngaiin chu ram hi lua untia anngoina le alenga neinunga om unti.

¹²Mi saluiin mi dik ansul rang a vala a rakam arial pe na.

¹³Puma han ama chu maniero tho inti, ani, ei hong tung rang ei riat sika.

¹⁴Anriang le antak ngai ansul rang le omdan adik ngai athat rang, mi salui ngaiin khendai ei phoi u na; a saili u ngai ei rakuai u na.

¹⁵A khendai u han amani malung chu vit intia, a saili u ngai chu ankhiaka om inti.

¹⁶Mi dik neinun alakte ei don chu mi salui neinun atampa ei don lup nek ten asa bet.

¹⁷Mi salui ban ngai chu ankhiaka om intia, mi dik ha chu PUMAN sur inti.

¹⁸PUMA han mi sa anzui mi ngai chu ariata, adonglua u rang chu kumkhuana a om rang ke.

¹⁹Hun saluia mualphui ansak no ni na; nidan kum ngaiam khop unti.

²⁰Mi salui ngai chu anpei unti na; PUMA adui ngai um anzola chiak asa ang ni unti; anpeia om untia, moikhu anga anpei unti.

²¹Mi saluiin chu a puka, thuan u mak mi dikin chu mi lungkham a mu na, a pek chachak.

²²A borsangna andom ngai han ram hi lua unti, khomak andom ngai chu anpeia om unti.

²³PUMA han ei se u na ranga aruai chachaka, ei zot dan atho ngai chu arung chachak.

²⁴Anbanam, anba theng thei no ni, PUMAN a kut le ei sur chian ke.

²⁵Naipang ka lei ni zeia; atun ka leia tar zei, tenchu mi dik chu anmaka om la mu ngai makunga akhuk abana kut ado la mu ngai makung.

²⁶Sunsot mi lungkham a muna a manpuka, akhuk ngai um borsang atung u chachak.

²⁷Asanok matan sin asa tho ro, hanke kumkhuana om na ti.

²⁸PUMA han ruirilna dik adita ami anthiang ngai chu marak ngai mak. Kumkhuana rang anrung rap ke, mi salui khuk ngai chu anpei inti.

²⁹Mi dik ngaiin chu ram hi lua untia asunga kumkhuana om unti.

³⁰Mi dik murin chu hianna chong aril chachaka, a malein ruiril dikna chong aril chachak.

³¹A Pathian dan chu a malunga a oma, ma ngai mak.

³²Mi saluiin mi dik chu a ena, athatna atho chachak.

³³PUMAN ama chu a kuta ma no nia, arui aril u tika han siatanlo phal no ni.

³⁴PUMA chu ngak tan, a lampui chu zi ro hanchu ram hi alua ranga na manson inti, mi salui ngai anpeia ei om u ha la mu na ti.

³⁵Mi salui ningneina don sabak; ei mongna muna thing anchor luai anga anbur zuak ka mu na.

³⁶Tenchu lampuia mi a sena, hanuk, enta, ama chu lei om lai mak; ka roka, tenchu muthei lai mukung.

³⁷Mi anerona bui mandang tan, mi dik ta ha en ro; hava ang mi ei hekna rang chu phukdaina ni intia,

³⁸anchai ngai chu anruala ansiata om untia, mi salui ngai hekna chu anpeina ke.

³⁹Tenchu mi dik ngai sandamna chu PUMA ata ke, ama chu antak lunghang laia a rakul ke.

⁴⁰PUMAN ama chu asana a mazok chachak; amana han ei anbetok u sika, mi salui ngai ata arunga a sandam chachak.