Read Ranglong SAM 38 Bible Online

SAM 38 - Ranglong bible

SAM 38

¹David Anpakna La O PUMA, taksita chunngo na tho tan; malung alumam na manchu no tan!

²Na thal ngai chu ka panga anvita; na kut le ka chunga na nama.

³Na malung ei lum sika ka taksa hi adam ngal om mak; kei sanok sika ka runa hin ahoi angkhat ngal om mak.

⁴Kei siatna hin ka lu ana hip diaia; puak arikpa anga, kei mator nok ani.

⁵Kei mona sika, kei popna ngai hi athuna asiat sua zeia.

⁶Ka na na, kan bur chiana; sunsota lunghanga kan vaka.

⁷Ka kong hi aluma anhang kiara; ka taksa him adam ngal om mak.

⁸Ka ponga, ka zeng zuaka; ka malung om ei hui nok sika kan kuia.

⁹PUMA, kei zotna ngai dora hi na makunga a om kiara; kei ankui him nang ata anthup nimak.

¹⁰Ka malung hi dup dup athona, ranak don lai makung, ka mit ei var nan um ana mak zeia.

¹¹Anan dit ngai le ka lom ngai chu kei pop ata ankhai kiar u na; ka unai ngai um alapana anding u.

¹²Kei damna apei ranga anrok ngai chu kei anok theina rang chang akam u na, kei siatna ranga anrok ngaiin um chong sanok aril u na.

¹³Hanum koi chu kuar aset anga re luia ka oma, chong thei lui a mur ang nok anga ka om.

¹⁴Mi chong re thei lui, a mura chunngona ngal suak ngai lui anga ka om.

¹⁵O PUMA, nang ke keina sabei. O PUMA, ka Pathian, nangin na masang na ti.

¹⁶“Hanok ten na mariam untia, ka ke sir achai le ka chunga anlian ving u ni” kei ti ke.

¹⁷Kan ba vivita; ka lunghangnam ka makunga a om chiana.

¹⁸Kei siatna chu puang ka tia; kei masialna sika lunghanga kei om rang.

¹⁹Tenchu anan duipui ngai chu asingansa asana, arat u na; dik lui taka anan mumak ngai chu apung zut u na.

²⁰Asa asanoka athuan chachak ngai hi asa kei val sika anan duipui ngai u ke.

²¹O PUMA, na marak no ro; O ka Pathian, ka kom ata alapana om no ro!

²²O Puma, anan sandampu ana san ranga annot ro!