Read Ranglong SAM 39 Bible Online

SAM 39 - Ranglong bible

SAM 39

¹David Anpakna La “Ka maleiin ei masial nokna rang, ka omdan ngai hi asa dima rung ka tia; mi salui ngai ka makunga a om sung u chu ka bai hi mur khitna le khit ka ti,” ka tia.

²Hanke a daireka chong luia ka oma, asa tiang um ka dairek! Tenchu ka lunghangna chu anson riama,

³Ka sungkuana hin ka malung a lum ru ruama. Kei mandon kei mandona han moi chu honga chuanga; hanuk, ka malei le chong ka rila:

⁴“PUMA, kei hekna rang le hotuk ni ten mo kei dam rang? Hontinmo ei ni ti, na manthei tan? Chukano kei ni zia na manriat ro.”

⁵Enta, ka dam sung hi kutpha tiat ripa na sina! Ka kum hi na mitmuna chu ite lem nimak. Mitin hi ei sat u na khit um apuma ite ni u mak.

⁶Mitin hi rali anga cheianleng ke na ni; (Selah) anpon papei u ke. Donglua a mankhom chachaka, tumo alua rang re luia.

⁷Hanuk, PUMA, atun hin imo kei ngak? Kei sabeina chu nanga ke ei om.

⁸Kei machai ngai dora ata na mazok tan, mi mo ngai anerona na siak no ro.

⁹Nangin nei ti ei ni sika chong makunga, ka bai um ang makung.

¹⁰Nei na zemna hi ka kom ata na thot pe tan! Nei na zem sika anpei ke ka ni.

¹¹Min ei machaina sika chunngo nei thona nei manchu chachak. Andit ei ruaina chu nger anga amasiat chachak. Mitin hi ite ni u mak! (Selah)

¹²O PUMA, ka borzongna hi rangai ta, kei na paina hi na kuar do tan; ka mit rathi chula hin dairek no ro. na khual ke ka ni, Ka khuk ngai dora ang han anthat mai ke ka ni.

¹³O, hin ata ka suaka, kei omlai nok man hin, kei hong har retna rang na hoi ro.