Read Ranglong SAM 40 Bible Online

SAM 40 - Ranglong bible

SAM 40

¹La ruaipu rang: David Anpakna La PUMA chu ka lei ngak zazama; ka tiang hong anhoia, kei pai chu ahong riata.

²Anpeina khur ata, dialpok annat sabak ata ana masuaka. Hanuk, ka ke chu lungpui chunga asiaka, ka ke phet ngai chu a mandeta.

³La thar ka mura a siaka, na Pathian anpakna chu. Mi tam takin hava ha mu untia, achi untia, PUMA chu iam unti.

⁴PUMA na anbetok ngai, omalian ngai le milak tianga ase ngai poisak lui chu borsang atung u.

⁵O PUMA, ka Pathian nangin boidong sin nei tho ngai le; koini rui nei mandonna ngai hi atam sabaka! Hava ngai ha na makunga anlang sua rua ni maka. Anriat rang ngal tho ila. A tel sua rua nimak!

⁶Anbolna le dalin dar chunga pham lem mak che na; ka kuar ngai hin ana ver pe zeia; halbiang dali le masial ranga dali chu zot mak che na.

⁷Hava suale, koiin, “Rangai ta, ka hong hi; lehkhabu zual han ka rui anziak ani na.

⁸O ka Pathian, nei zot zat atho hi ka raisanna ke! na dan rui chu ka malunga a om chian ke.”

⁹Ankhomna lianpa na han dikna thang ahui tang ka hai pui. O PUMA, rangai ta, ka mur hi manar no ning ti na riata.

¹⁰Nei dikna chu ka malung sunga thup makunga; Iamruana nei omna le na sandamna chong ke tang keia hai. Na lungkhamna le nei takna chu ankhomna lianpana mi ngai koma han thup makung.

¹¹O PUMA, nei na ditna ngai chu ka rang manar no ro. Na lungkhamna le nei takna han na rung chian rase.

¹²A sanok atel sua nok zatin ana hual tita, muthei lai makung! Kei masial ngaiin ana hong huam u na, hasik han muthei lai makung; hava ha ka samsang ngai neka atama, ka malung hi apong zei.

¹³O PUMA, lungkham taka na mazok tan! O PUMA, ana san ranga annot ro!

¹⁴Kei damna apei ranga anan rok ngai chu mualphui ansaka le anzaka om u sela. Kei siatna chunga apham ngai chu nuk akira anzaka om u rase.

¹⁵Anemmo ana ti ngai chu mualphui ei ansak u sika ratha ta sabaka om u rase.

¹⁶Anan rok ngai doran chu nanga han raisan le aphama om u rase. Na sandamna andit ngai han, “PUMA chu anpaka om rase,” ti chian u rase.

¹⁷Koi chu anriang le antak ka ni na, hanum ni rase PUMAN ana mandon chachaka; nang chu ana sanpu le anan zokpu na ni na. O ka Pathian, sot no ro do!