Read Ranglong SAM 42 Bible Online

SAM 42 - Ranglong bible

SAM 42

¹La anruaipu rang: Kora pol ngai La Sakhin, tidunga ti ningaola phuk ansam anga hin, O Pathian, kei damna hin nang ei na zota phuk ansam ke.

²Kei damna hi Pathian ei zota, Pathian adam ei zota, a ti anral ke. Hotikamo Pathian makunga kei va tunga, kei antong pui rang tak?

³Ka mitrathi hi asun azana ka bu ke, “Hovanmo na Pathian chu?” ei na lei ti chian u le.

⁴Hiva rui hi ka riattita, kei damna hi ka sunga ka leia, mipui bila ka sena, raisanna le anpakna rahu le mi tampa panta, Pathian anmokna in apana ma kei ruai chachak ngai ha.

⁵O kei damna, ichangmo nei anbur chian? Ichangamo ka sunga hin nei anpon? Pathian sabei ro; a mela damna sika ama chu kei la manpak rang ke.

⁶O ka Pathian, kei damna ka sunga hin anbur chiana, hasik han Jordon le Hermon ram ata Mizar mual ata hin ka na riattit ke.

⁷Na ti luang rasa sur sura son tin thuk le tin thuk chu ankui u na; na tiduar le na tinsok ngai dora han ana hip diai zeia.

⁸Tenchu PUMAN a lungkhamna chu suna chong pe intia, a la han zana na ompui inti, kei damna Pathian koma a borzongna han.

⁹Pathian ka lungpui koma han, “Ichangmo nei na mangil? Ichangamo ka sunga hin nei anpon? Pathian sabei ro; ama chu kei la manpak rang ke ka mel anan dampu le ka Pathian chu.”

¹⁰Ana dui ngaiin ana ero u na, “Honmo na Pathian?” a ti na ana rakel u chachak

¹¹O kei damna, ichangmo nei anbur chian? Ichangmo ka sunga nei anpon? Pathian sabei ro: Ama chu kei la manpak rang ke, ka mel andampu ka Pathian.