Read Ranglong SAM 45 Bible Online

SAM 45 - Ranglong bible

SAM 45

¹La ruaipu rang: Lungkhamna La Ka malung hi asana aliam zuzuta, rengkhit ruia ka chong phua chu ril ka ti.

²Miring nai ngai neka na mel asa ruka; lungkhamna hi na mura anlei ke, hasik han Pathianin kumkhuana rang aborsang ei na pek ke.

³O, mi rat, na khendai na konga a va ro; nei anlianna le nei satna ngai lehan.

⁴Chongtak le omannuaina le dikna sika nei satna le anlianga neinungna le sakor chunga a chuanga. Hanke na chang kut tiang rathatak a om tatak na manchu inti.

⁵Na thal chu anzuma, rengkhit adui ngai malunga han anphun nguta; mitin hi na thuaia anba u na.

⁶O Pathian, na reng chomphang chu umora om rang ani; mi mandang om nokna reng sunrol chu na rang reng sunrol ani.

⁷Dikna chu na dita, asanok chu na matira. Hasik han, Pathian, na Pathian han, na lom ngai neka atama raisanna sariak ei na manthi zei ha.

⁸Na puan ngai dora ha mura marim, aloe marim, thingthumte marim, annam phuphunga; saiha le ansin in ngai tingtang achi tatei rahu honga suak ngai han na rai ei mansan ke hile.

⁹Nupang asa ngai bila han reng nainupang ngai anchel u. Na chang tiang han ophir rangkachaka anlianga reng mi chu andinga.

¹⁰O, ka nainupang, rangai ta, mandon tan la, na kuar do ro; na mi ngai le na pa ina mi ngai ha mangil ro.

¹¹Hanke rengkhitin na mel asa hi ei na madit rang; ama chu na Puma; han chu ama chu chibai buk chachak ro.

¹²Tura nainupang chu nuampek achoia hava han om inti; mi bila a nei ngai nget han na lungkhamna zong unti.

¹³Reng in sunga reng nainupang chu anlian kiar u na! A puanchoi chu rangkachak le anliang ani.

¹⁴Puan anchi anhui antiang rengkhit koma ruai untia, ama zipu, a lom nungak ngai chu, na kom hong ruai unti.

¹⁵A pham sabak le raisan sabaka ruai untia; rengkhit ina han lut unti.

¹⁶Na pa ngai neka na nai ngai om untia, ama chu phil chung pumpuia hin mi liana sin na ti.

¹⁷Na raming hi akhuk akhuka ariattitna ranga sin ka ti, hava sik han mitinin kumkhua taituana raisan chong na ril unti.