Read Ranglong SAM 46 Bible Online

SAM 46 - Ranglong bible

SAM 46

¹La ruaipu rang: Kora mi ngai Anpakna La Pathian chu nei anrungna le nei ratna, nan tak laia ana san ranga ana dep chian ke.

²Hasik han leilung hi alei anthula, mual ngai hi tipuilian sunga anthot viakam nisela achi no ma ni;

³ti ngai chu ari susura anphul zuzut ngal sela, ti duar ansok sika mual ngai hi annik ngal sela, achi thak no ma ni. (Selah)

⁴Ti dung angkhat a oma, hava abaksem ngai han Pathian khopui rai a mansan chachak, chungnungkhita ei omna mun anthiang chu.

⁵Pathian chu amalai taka a oma; annik no nia; khua avar phing lehan Pathianin san inti.

⁶Namtin rahu don u na, ram ngai chu annika; ama han rahu a peka, leilung hi azoia se.

⁷Sipai ngai PUMA chu koini na bila a oma; Jakob a Pathian chu koini rakul ansang ani. (Selah)

⁸Hong u ta, PUMA sintho ngai hi en u ro, leilung ei masiatzia ngai hi.

⁹Ama han anduina chu kolmong tenpeia a manmong chachaka; saili chu ama khiaka, asei chu abong abong a manchanga, rot ngai chu moia a hal biang chachak.

¹⁰“Dairek u ro,” “Pathian keini ti re u ro, namtin bila anpaka om ka tia, phila hin anpaka om ka ti.”

¹¹Sipai ngai PUMA chu koini koma a oma; Jakob a Pathian chu koini rakul ansang ani. (Selah)