Read Ranglong SAM 50 Bible Online

SAM 50 - Ranglong bible

SAM 50

¹Asafa Anpakna La Pathian, Pathian nget, PUMA han chong a rila; leilung hi ni suakna ata ni lutna tenpei a paia.

²Asa anzuina, Zion ata han, Pathian chu a ra-ang a masuaka.

³Koini Pathian chu hong intia, dairek no ni; a maton tiang han moiin kang zuzur intia.

⁴A mi ngai rui ei ril theina ranga chung tiang anvan ngai le phil hi pai inti.

⁵“Ka mi anthiang ngai ka koma hong man khom u ro, me thata ka koma dan akhit ngai chu,” ti na.

⁶Hanchu, anvan ngaiin ei dikna chu tang ahaipui untia, ama Pathian nget ha ruirilpu ani na. (Selah)

⁷“O ka mi ngai, rangai u ro, chong ril ka ti; o Israel, rangai ro, na manthiang ka ti. Koi hi Pathian, na Pathian nget chu ka ni hi.

⁸Nei anbolna ngai sika na ngo no ning na halbiang dali chu ka matona a om chian.

⁹Na in ata chu serattang ngal rasua no ning, na ran khumna ata keltang ngai um rasua no ning;

¹⁰ram thuaia me tatei ngai hi ka ta ke mual asangkhat pei chunga ran a om ngai um.

¹¹Muala va ngai dora ka riat kiara, ram sa ngai um ka ta ke.

¹²“Ka von anchamam na ril no ning; leilung le asunga a om ngai dora hi ka ta ani na.

¹³Serattang me kei saka kel thisen kei nek rang mo?

¹⁴Pathian koma raisan chong aril anbolna dar tan la; na chongtin um chungnungkhit koma len ro;

¹⁵Hanuk, nei anponna ni han na pai tan; na mazok ka tia, hanke nangin neina manpak rang,” a ti na.

¹⁶Mi salui koma han chu, Pathianin, “Ka dan apuang rang, imo nang na ningneina? Ka dankhit hi ichangamo na mura nei mantai chian?

¹⁷Anchuna na mumaka; ka chong ngai hi nuk tiang na pei tira.

¹⁸Anru na mu le na zom lena, uiare pa ngai ret nan loppui chachak.

¹⁹“Asiat ranga na mur na manga; na malei le anhuangna na sina.

²⁰Ansut chunga na parualpa na rilsiata nang na nu naipasal nget chu nei mumak chachak.

²¹Hava ngai dora na tho na, tenchu ka daireka, na malunga nang na anga nei na be. Tenchu chunngo na tho ka tia, na mit muna adonte na manlang ka ti.

²²“Nangni Pathian anngil ngai, hia hi mandon u ta, hanok aniten na pot lam chit u ning, nangni anan zokpu rang tute om no ni.

²³Tukareng phamna chong anbolna a dar doran koi ana manlian chachaka; hanuk, a omdan anrengpu koma han, Pathian sandamna manmu ka ti,” a ti na.