Read Ranglong SAM 58 Bible Online

SAM 58 - Ranglong bible

SAM 58

¹La ruaipu rang: David Anpakna La Dikna chong chu adaireka mo nei ril tatak u? O miring nai ngai, adik taka mo rui nei ril u?

²Na malung u na han asanok sabak na tho u chachaka, phila na kut u na lektak abui thaka nei tho u chu na mai chachaka.

³Mi salui ngai chu nu vonsung ata ngala Pathian le ansena om u ke; anzir phing u le milak chong arila anvak titir u.

⁴A tur u chu marul ang ke ei ni; phephu kuar aset, akuar anhiptit ang ani u,

⁵hava nai han marul anlam thei ngai chong rangai zot mak, ei chole ang dora le adoiam nisela.

⁶O Pathian, a bai u na han a ha u ngai kham tan la. O PUMA, akoibaknei vanglai ngai ha lianpa ngai ha kel pe ro.

⁷Amani chu tin rat sabak aluang anga zoi rase; athal ngai adin le, achat anga om zel rase.

⁸Kuangkoroi, tina ei zoi anga ni rase; ahun noka nupang nai anei, ni ra-ang man lui ang ni rase.

⁹Na bel u ngaiin raling thing alum ariat u man um ama ha kellaiherin la viak inti; aring le achar akang lai um.

¹⁰Mi dik han ratha thuanna ei muna pham intia; mi salui ngai thisen lehan a ke rasu inti.

¹¹Hatuka min, “Mi dik ranga ratpak a om tataka; Phila hin ruirilpu Pathian aleia om tatak ke,” ti unti.