Read Ranglong SAM 64 Bible Online

SAM 64 - Ranglong bible

SAM 64

¹La ruaipu rang: David Anpakna La O Pathian, kei antakna ruia hin ka he na rangai pe ro! Ana dui ngai anchina ata hin kei damna na mazok ro!

²Asa nok atho ngai ril maruk chong ata, asiat atho ngai ei anchun u na ata han, na thup ro.

³Amani han amalei u ngai khendai anga aman ngei u na athal u, chong akha ngai lehan adin u na.

⁴Mi ei siatna bui ngai lehan adin u na; achi lui ta na anlaiseka a kap rak chachak.

⁵Asiat atho ranga anthor u na; maruka chang akam ruia anril u chachak. “Tumo hava ha amu rang,” a ti u na.

⁶Achaina a rok u chachaka, “Takasata na rok zit zei,” a ti u na. A sung u tianga mandonna le malung chu anthuk sabak kiar ke.

⁷Tenchu Pathianin amani kap intia, anlaiseka thal le pop untia.

⁸Hantin han, amalei u lenin amani ei dui sika siata anpeina na ruai unti; amani amu ngai doran alu avik unti.

⁹Hatuka mi doran achi untia; Pathian sintho chu ril untia, a sintho chu ahian vanga mandon unti.

¹⁰Mi dik ngaiin PUMA na han pham untia, amana han anngam untia; malung adik anput doran ansong pui unti.