Read Ranglong SAM 68 Bible Online

SAM 68 - Ranglong bible

SAM 68

¹La ruaipu rang: David Anpakna La Pathian chu anthui sela, adui ngai chu andara om sela. Ama anmumak ngai um a makunga rot rase.

²Moi khu hi thinthin ei sema ei anpai anga; amani chu sema anpeia om u rase, khuailiang hi moi aluma ei zoi anga, mi salui ngai chu Pathian makunga anpei rase.

³Mi asa ngai chu anphama om sela; Pathian makunga raisan rase; ani, aphama a raisan rase.

⁴Pathian anpaka la tho u tan la, a raming anpaka la tho u ro; rot le philchar apala ahong ranga han lamlian sung pe tan manbit u ro, a raming chu JAA ani, a makunga han rai mansan u ro.

⁵Pathian ei omna anthianga om chu, pa bui ngai pa le arong ngai ruirilpu ke.

⁶Pathianin mi sang ngai chu sungkua bila a malop chachaka, anok ngai a mazoka, ravan satna na a manlut chachak, asel ngai chu ram achara a om u chachak.

⁷O Pathian, na mi ngai maruaia nei hong suaka, philchar apala na rakan lai han, (Selah)

⁸phil hi annik nunura, anvan ngai um Pathian makunga azana; Sinai mual ngal so Pathian makunga, Israel ngai Pathian makunga han, ei annik nunur ha,

⁹O Pathian, nangin rua tampa na masula, na changai ha, aduai lai han, na mandeta;

¹⁰na mi ngai hava han a om u na; O Pathian, nang han nei satna le anriang ngai rang na zona.

¹¹Puman chong apeka, thangva rilpu nupang atampan aril u na:

¹²“Sipai ngai reng ngai chu arot, arot u na!” in angak nu han rallak sum a sema:

¹³Vasu mantha sumru na anthuama, a mantha mer um rangkachak a elpa na anthuam anga bera rakul kar ngaia nei zal rang mo?

¹⁴Athotheikiarin hava han reng ngai a chenrak laia, Zalmon muala arial achul ang ke.

¹⁵Basan mual chu Pathian tang ani na, Basan tang chu tang ansangpa ke!

¹⁶Mual ansang ngai o, Pathianin ei omna ranga a mual madit chu! Ichangamo khamaret ena nei en u? Ani, PUMA chu hava han a om chian rang ke!

¹⁷Pathian rot chu sasi a sasi, asang asang atampa ke, PUMA chu Sinai muala ei om ang han, hava bila han mun anthianga a om zei.

¹⁸Nang chu chung tiang na kala, nei sur ngai chu selkeia na ruaia; miring ngai bila nuampek ngai na mana. Ani, asel ngai bilam; PUMA Pathian chu akom u na ei om theina rang.

¹⁹PUMA, koini na puak nikhuantina a na pel pe pu; anan sandampu Pathian chu anpaka om rase. (Selah)

²⁰Pathian chu koini na rang anzokpu Pathian ke; athina ata asuakna chu Puma JEHOVA ta ke.

²¹Tenchu, Pathianin ama adui ngai lu chu tuka phel pok inti, asanok tianga se zela a sam antur bub ha.

²²Puman, “Basan ram ata ruai ret ka tia; tipuilian khengtezol anthukpa ata chu ruai ret ka ti

²³na ke chu thisena na machia theia, na ui malei ngaiin nei anduipui ata changai ei don theina rang,” a tia.

²⁴O Pathian, na kal choi lai amu u na, ka Pathian ka rengkhit mun anthianga ei se lai ha.

²⁵Nungak khuangte asut ngai kara han, la tho ngai man ansa u na, maring rasa athei ngai han azi u na.

²⁶“Ankhomna na han Pathian manpak u tan la; Israel ngai anchunna na han PUMA chu manpak u ro!”

²⁷Nai matona Benjamin ngaiin ma ruaia, Juda milian ngai le a upa u ngai, Jebulun milian ngai Naptali milian ngaiin azi u na.

²⁸Na Pathian han na sinthotheina ha chong apeka. O Pathian, koini ranga nei na tho pe chu manrat ro.

²⁹Jerusalem na biakin ei ni sika reng ngaiin nuampek na la hong pe unti.

³⁰Nol bila me rang ngai chu rakok tan; nam atei, serattang le ate rual ngai rakok ro, anbuna a neinun u ngai na makunga a hong dar u maseng pei. Adui rang azot ngai chu chen ro.

³¹Aigupta ram ata mi lian ngai hong suak untia, Ethiopia ngai chu akut u Pathian tiang aphar ranga lei annot unti.

³²Phila ram ngai, Pathian chu la le manpak u tan la. O, Puma anpakna la tho u ro.

³³Tiana anvan ngai chunga ansutpu chu, rangai u ta, he pui ei va sua u so.

³⁴Pathian koma ratna pe u tan; ei lianna chu Israel ngai chunga a oma, ei ratna chu chung vana he ei om.

³⁵Israel ngai Pathian chu amun anthianga, a mi ngai kom ratna le sinthotheina apek chachaka, Pathian chu anpaka om rase!