Read Ranglong SAM 69 Bible Online

SAM 69 - Ranglong bible

SAM 69

¹La ruaipu rang. David Anpakna La O Pathian, na sandam ro! Ti chu ka ring ten pei ani zei;

²Demdum anthukpana, anthin rian rang ei buina na ka chul zei hi le; tin thukpana, mi ei chul chachakna na, ka lut zei hi le.

³Kei ankhekna na, ka raha hula, ka pong zei. Ka Pathian chu suana lamveng kei thona na ka mit rang achat zei.

⁴A nan mumak ngai chu ka samsang neka atam u na, Dikluia, ana thatna ana val ngai chu mi ratpa ngai ani u na. Ka lak nokam asia manthuan u chachak.

⁵O Pathian, nangin kei mozia na riata; kei dik noknam na kom chu anthup mak.

⁶O Puma, sipai ngai Pathian, nang ana iam ngai chu koi ka sika mualphui ansak no sela, O Israel ngai Pathian, nang anan rok ngai chu koi ka sika maimok ansak u no rase.

⁷Nang na sika mi rilsiatna kei tiar sika, maimok nan ka mai amakhu zei.

⁸Ka unai ngai bila khual ka changa, ka in sungkua ngai bila ram ateia mi ka ni zei.

⁹Kei anpekna sika na biakina moi anga ana kanga; na siat aril ngai rilsiatna chu ka chunga achul zei.

¹⁰Ka chapa, bu ngoi chunga adama kei damna rang, hatuka mi rilsiat kei lona ei chang:

¹¹Lunghangna puan ka rasil le. Amani ranga ariat tianga ankhina ka ni zela.

¹²Lamsuana ansut ngaiin ka rui aril u na, zun ri ngai sumdem tho rang duai ke ka ni.

¹³Tenchu, O PUMA, hun asana, na kom bor ka zonga. O Pathian, lungkhamna det nei ni sika, na sandamna chongtak le na masang ro.

¹⁴Demduma na masul no tan, na mazok ro: anan mumak ngai le tin thuk ata, azoka na manom ro.

¹⁵Tiliana na man tan no tan: tinthuka na masul no ro; khurin um chokbai na manchip pe rase

¹⁶O PUMA, na lungkhamna sa le; na masang ro; lungkhamna nei donzia ang zela, ka tiang hong anhoi ro!

¹⁷Na suak kom na mai thup no tan; lunghang kei ansak sika; na masang lilip ro!

¹⁸Ka nun hi hong dep tan ratan ro; anan duipui ngai sika na san ro.

¹⁹Nangin ka siat ei anrilna ngai, mualphui kei ansakna ngai, kei anzakna ngai dora na riata; anan duipui ngai chu na makunga ke ei om zit.

²⁰Min ei na ril siatna hi ka malung amanna na, lunghang ana mansak chachak. Hankeng lungkham ana mu mi ka roka, tenchu tute om mak; lungngam ana sak zat miring um ka roka tenchu tute mu makung.

²¹Ka von anchama, nek rang thina tur ana pek u na; ka ti anrala, ti thur pa ana pek u.

²²Bukhlai anzar chu chang sung ang lei ni pe u sela; phukdai riama a om ulai tak dip ang lei ni pe u rase.

²³A mit ngai ei mu u thei nokna ranga, manzing pe ro! a lampui um manchun pe babang ro!

²⁴Na malung ei dik nokna chu achunga masul pe tan la; na taksitna chu achung u na om rase.

²⁵Ei om u na chu ram biang sela; a puanin u na tute om no rase.

²⁶Nei zem ha chu asinsak u na nei man liam ha chu lunghang ei man sak zia rang chu aril u chachak.

²⁷Ei siat u nana siatnan makhu sa tan la; na sandamna na lut pial u no rase.

²⁸Damna buna ata a raming u at pe sela, mi dik ngai bila anchel u no rase.

²⁹Tenchu anriang le antak ka ni na; O Pathian, na sandamna le mun ansanga na re ro.

³⁰Pathian raming la le manpak ka tinga; raisan chong antungna le manlian ka ting.

³¹Hintina, serattang raki le matin nek ten, PUMA chu araisan bet inti.

³²Lungkham aruaia amu u le, arai man san untia; nangni Pathian anrok ngai na malung dam u rase.

³³PUMAN suak anlon ngai chu a mandona, mi ankhum ngai chu ningchial makhai mak.

³⁴Phil le anvanin ama chu manpak sela, tipuilian le asunga singansa thei ngai dora le.

³⁵Pathian chu Zion chu san intia, Juda khua ngai manding ret inti. Hankeng ei om u rang ata manchang len unti.

³⁶A suak u khuk ngai um donglua lua untia, aiam ngai um asunga om unti.