Read Ranglong SAM 7 Bible Online

SAM 7 - Ranglong bible

SAM 7

¹David Anpakna La O PUMA, ka Pathian, nang na kom keng kei anboi; anan zul ngai ata na sandam tan na rung ro,

²Ani nokten, a rungpu abuia, akoibaknei anga,

³O PUMA, ka Pathian, ha sin kei lei tho aniten, ka kuta adik nok alei kop aniten,

⁴Ka lom ranga asiat kei lei tho aniten chu, ani, asik abuia ana duipu hi kei lei mazok keng.

⁵Ana duipun kei damna hi ana razula, na huam mai rase, ani, kei damna hi phila na thin chit sela, kei anlianna ngai um philvut bila na siak rase! (Selah)

⁶O PUMA, taksita anthui tan la! Ana dui ngai taksita dui ro; ka rang har ro! Dikna ruiril rang chong na peka,

⁷mitin ankhom ngaiin na hual rase; chung ansang ata amani chunga ruiril ro.

⁸PUMAN mitin rui a zek chachak. O PUMA, koia kei dikna le ka malunga satna a om anga rui na ril ro.

⁹O, mi salui ngai sanokna ngai chu lei mong sela mi sa ngai chu mandet ro. Pathian adikin chu malung ngai le rilru ngai keng ei mansin.

¹⁰Ka phocheng chu Pathian koma a om; ama chu malung adik anraput ngai sandampu ani.

¹¹Pathian chu ruirilpu dik ani, ama chu nikhuan tin mi salui ngai chunga takasi Pathian keng.

¹²Mi a kir nok aniten a khendai angei sabak a tat inti; a saili chu arakuaia, thal a man ban a.

¹³Thina kuttuk ngai chu ama thatna rang asin sua zeia; a thal ngai chu an al theia asina.

¹⁴Enta, asanok a vonga; asanok atho a vonga, milak chong a mazira.

¹⁵Khur asina, anthukpana a huata, ama khur sina han achula.

¹⁶Asiat ei thona ha ama lu chung ngeta hong kir ret intia, rathatak oma asin tho ngai chu ama sip ngeta hong chul inti.

¹⁷PUMA chu, ei dikna sika hin, a koma raisan chongril ka ti; PUMA chungnungkhita raming anpakna la tho ka ti.