Read Ranglong SAM 71 Bible Online

SAM 71 - Ranglong bible

SAM 71

¹O Puma, kei iamna na kom mandet tit ka tinga; mualphui na sak ngal no ro.

²Nei dik sika, na san tan, na mazok ro, ka tiang na sankuar hong sung tan, na sandam ro.

³Nang chu, kei omna lungpui, ka kal choina ni tan la; na sandamna chong na ril ro, ka lungpui le ka suanglung na ni.

⁴O Pathian, mi salui ngai kut ata na mazok tan, mi dik lui le nun ase ngai kuta tam na mazok ro.

⁵O Puma PATHIAN naipangte ka ni len ata; kei na iam le kei na sabei na ni.

⁶Ka nu vonsunga ka om lai len ata nana sura, vonsung ata anan suapu na ni; nang ke, kei na manpak chian rang.

⁷Mi ranga boidong ka om sabaka, tenchu, nang chu kei anrungna det khit ke na ni.

⁸Ka mura nang anan pakna la bit intia, sun so sot nang na nai ka ting.

⁹Ka tar tik na mathan no tan, ka chuaiam na ma no ro.

¹⁰Anan duipui ngaiin ka rui aril siat u na, ana vang ngai um anchel u.

¹¹“Pathianin amak zei, Razul u tan, sur u ro; asan rang om lai mak” a ti na.

¹²O Pathian, nan kar pui no ro; O ka Pathian, ana san ranga hong anrap ro.

¹³Anan duipui ngain chu anzaka thi u sela; kei siatna ranga anrok ngai chu mi rilsiat le a maimok u rase.

¹⁴Hanum nisela, koiin chu na sabei tit ka tinga; na manpak riam ka ti.

¹⁵Ka murin nei dikzia ril intia, sun khakhat na sandamna ruiril ka ting hotuk ten mo kei ril rang rethei makung.

¹⁶Puma PATHIAN sintho lian le, hong ka tinga; nang nei dikna rong ke kei ril rang.

¹⁷O Pathian, naipangte ka ni lai ata nei na manchu; atun ten na borsang sintho ka manriat chachak.

¹⁸O Pathian, ka tara ka sam anchuakam na ma no ro; nei ratna hi thuithar ngai kom le, na sintho theina hi thuithar ala om zel rang ngai kom um manriat ka ting.

¹⁹O Pathian, nei dikna hi ansang sabaka; O Pathian, sin alian a thopu, Nang na ang tumo a om?

²⁰Nang lunghang ansakna tam tak a nan mupu han; na mandam ret tan, khur anthuk ata na masuak ret na ti.

²¹Nangin kei lianna na maphunga; hong anhoi ret tan lungngam na sak ro.

²²Pirkhuang le na manpak ka tinga, O ka Pathian, na chong tak nget manpak ka ting, O nang Israel ngai mi anthiang, tingtang le nang anpak la tho ka ti.

²³A nan pakna la ka tho tik ka mur raisan intia; ka nun nei ratan um a raisan sabak inti.

²⁴Ka maleiin um sunkhat nei dikna rui ril intia; kei siatna rang anrok ngai chu maimok ansaka om u rase.