Read Ranglong SAM 72 Bible Online

SAM 72 - Ranglong bible

SAM 72

¹Solomon Anpakna La O Pathian, na ruirilna chu reng pe tan, nei satna chu reng sapa pe ro.

²Na mi ngai chu singna le ruiril pe na tia; na mi anriang ngai chu adik phita ruiril pe na ti.

³Tang alian le asin ngaiin singna le; mi kom phukdaina hong mantung unti.

⁴Aman chu mi bila anriang ngai rang ruiril pe inti a; antak sanai ngai chu sandam inti, anpangsep ngai chu mazoi inti.

⁵Ani om sung chu na chi untia; tha om sung um; thuithar ala om zel rangam.

⁶Chiak chunga rua ei chul anga, chul intia, phil anchoppu anga han.

⁷A dam lai mi dik ngai chu anson sabak untia; phukdaina chu tha om tenpei om inti.

⁸Tipuilian ata tipuilian tenpei ningneina don intia; tipui ata kolmong ten peiam.

⁹Philachar rama a om ngaiin amok untia, ama anduipui ngaiin chu philvut maliak unti.

¹⁰Tarsis ram le mualanlan reng ngaiin ratpak hong koi untia, Sheba le seba reng rama reng ngaiin neinun hong dar unti.

¹¹Reng ngai dora a makunga anbok intia, namtinin ahaso adom unti.

¹²Pathianin pai intia, san inti, anriang asan rang abui ngai um san inti.

¹³Anriang le antak ngai lungkham mun tia; antak ngai rang sandam inti.

¹⁴Ningchial kaina le mi lektakabui ata ei damna ratan pe intia; a thisen u chu ama ranga alu khit la ni inti.

¹⁵Hanuk chu, dam untia, Sheba rama rangkachak chu ama la pe inti, min bor la zong pe chachak intia, sunkhat bor la pe unti.

¹⁶Phila, tang chunga bu tampa la om intia, sapar chu Lebanon anga lan vik chut inti, khuana mi ngai chu phila chiak anga la rol unti.

¹⁷A raming chu taituan tenpei dai no ni, a raming chu ani om tenpei dai lui tana om zel intia; mi ngai chu borsang mana la om untia; namtinin van asa ke la ti unti.

¹⁸Puma Pathian, Israel ngai Pathian chu, anpaka om rase; ama rong keng boidong sin atho chachak.

¹⁹A raming alian chu taituana anpaka om zel sela; phil pumpui hi ei lianna bit rase Amen! Amen!

²⁰Jesai naipasal David borzongna chu ahek zei.