Read Ranglong SAM 73 Bible Online

SAM 73 - Ranglong bible

SAM 73

¹Asafa Anpakna La Pathian chu Israel ngai chunga asa na, malung anthiang ngai chungam asa.

²Hanum nisela, ka ke sir achai vivita; ka ke phet antol chachak.

³Mi salui ngai van ei sa u zia ka mu na; omliak atho ngai ning ka ol chachak.

⁴Athi u tik tiar ngal u chachak maka; ei rat u na chu adet riam ke.

⁵Mi tei anga antak u maka; mi tei anga min um sinsak u mak.

⁶Hasika han, liansena chu raka anga a ringa ali u na, lektakbuina chu raliang anga anvo u.

⁷Ei mar u sika a mit aping u na; a malung ei zot u neka tam adon u na.

⁸Manitangzar atho u na, a chong ril u ngala mi mu u mak, anphumaia ke chong ei ril u.

⁹A ner u chu chungvan asuna; a malei um chu phil ke ei aver.

¹⁰Hasika han, ami ngai akir ret u na; Ei diknokna mu ngal u mak.

¹¹“Pathianin hontinmo ei riat? chungnungkhit han hontinmo ei riat thei rang?” a ti u na.

¹²En ta, hia ngai hi mi salui ani u na; a om ei hui u panga anei riam u.

¹³Ka malung kei manthiangna hi akorong ke; ka kut kei mansanam.

¹⁴Sun khakhat min ana sinsaka; azing kipa he sia ka sak.

¹⁵“Havantin anga ril ka ti” ti ngal ila, enta, na nai u ngai tak chunga asia kei tho phua zek inti.

¹⁶Hiva ngai hi ka mandona; ka rang achan antak.

¹⁷Pathian mun anthianga ka lut tik le; ei hekna rang ka mandona.

¹⁸Amani chu mun annala na re nam, asiatna nam na pei chachak.

¹⁹Hontinmo chomokhata ei anpei u o! Rathatak sabaka ke ei anpei u.

²⁰Min anthui suale ramang ei tel nok anga, O Puma, nanthui tik chu ite na betok no ta ni.

²¹Ka malunga lunghang ka chula; ka malunga anvit anga ka om.

²²A mo le ka bai bu ui ngal re lui; nang naranga chu rama sa ang ke ka ni.

²³Hanum nisela, na kom ka om chachaka; ka changkut hi nana lei sur pe chachak.

²⁴Nang nei zot dana aruai ka nanga; hava suale ke, anlianna muna neina pham rang.

²⁵Nang nok ten anvana tumo kei don? Philam nang rong nok ten keia dit tu te om mak.

²⁶Ka taksa le ka malunga achuaia; hanum nisela, Pathian chu taituana ka malung ratna le ka changai ani.

²⁷Enta, nang le ankar chu la thi untia; na kom ata ankhai tak pei chu lan pei inti.

²⁸Koi ka ranga chu Pathian adep hi asa, Puma PATHIAN chu anrung nana mang ka tia; a sintho ngai rui hi kei ril theina ranga.