Read Ranglong SAM 74 Bible Online

SAM 74 - Ranglong bible

SAM 74

¹Asafa Anpakna La O Pathian, Ichangamo taituana ranga nei na pei? Ichangamo, na bera sul asak ngai takchunga na mit na mai nei mankhu?

²Tianlaia nei ratan, na mi ngai hi, na donglua ani ranga neia thang sua ani na; nei omna Zion tang ata re tit ro.

³Asiat zit sua chu hong enta, anduipui ngaiin mun anthianga asia atho sabak u zei.

⁴Nang anan duipui ngai chu na mi ngai ankhomna na aniak sabak u na; apuanzar u chu ei andangna ranga a tar u.

⁵Thing asir ngaiin, rei le thing asir ranga ei alang u anga ke anlang u.

⁶Atun chu ramil ei sin u asa ngai dora el le sekchoiin amasiat u na.

⁷Na mun anthiang chu ahal u na; na raming om nam anlang thei luia ke abum u zei.

⁸A malung u na, “Ma siat kiar u rei,” a ti u na. Hiva rama Pathian biakin dora ahal zit u zei.

⁹Nei mandangna chu mu lai makme na; deari ngal om u lai mak. Itukmo ei sot rang, ariat ngal om u lai mak.

¹⁰O Pathian, ralin ituktenmo na siat ei ril rang? Na ralduiin umor tenpei mo na siat ei ril rang?

¹¹Ichangamo na changkut nei kei ret? Na kut rasua tan, amani chu that ro.

¹²Hanum nisela, tianlai ata Pathian chu ka reng keng; maniapur lailina sandamna sinpu ha.

¹³Nei ratna le tipuilian na baka; tia dragon ngai chu na rachana.

¹⁴Tia Leviathan ngai chu na rachana; ame ha philachar rama om ngai kom ei sak u rang na peka.

¹⁵Nangin ti nar le tilian chu na mazoka; nangin tilian ngai chu na makhanga.

¹⁶Sun le zan hi na ta ani na; a elpu le ani so nang nei sin ke.

¹⁷Phila ramri dora nangin na sin kiara, nudin surlai um nangin nei sin ke.

¹⁸O PUMA, a nan duipui ngaiin ei na rilsiat u na hi, re tit ro; nam amo ngaiin na siat aril u chachak.

¹⁹Lungkham aruai ngai ratha chu mi salui ngai kom pe no tan; na mi tak ngai dingmun chu umora mangil no ro.

²⁰Na chongtina om tan, azing mun hi asiana bit zei.

²¹Min ei nochan ngai chu mualphui ansaka kir u no sela; anriang le antak ngaiin na manpak u rase.

²²O Pathian, anthui tan, anril ta ro; amo ngaiin sun khakhat na siat ei ril u chu re tit ro.

²³Na raldui ngai rahu chu mangil no tan, ral rahupui chu anvan asun ke.