Read Ranglong SAM 77 Bible Online

SAM 77 - Ranglong bible

SAM 77

¹Asafa Anpakna La Pathian tiang ana san ranga kan kheka; Pathian tiang anan ngai ranga kan kheka.

²Ka boiadong nikhua Puma chu ka roka; ka kut hi zan ngala masum luia ka lang chian; ka nukin phukdaina zot mak.

³Pathian ka riattitam, kan pon chachak; kan dona, ka ratha hi achuai chachak. (Selah)

⁴Ka mit hi na man meng tita, chong thei lui khopa kan pon chachak.

⁵Tiana nikhua ngai ka mandona, tiana kum ngai ha.

⁶Zana ka mandona; kan dona kan kel chachaka, ka rathan um malung apeka aroka.

⁷“Puman umora eina heng rang mo? A lungkhamna na manmu pial lai no ni mo?

⁸A lungkham chuailui ha umora rang anpei mo ni zei? A chongtin umora rang anpei mo ni zei?

⁹Pathianin lungkhampu ei ni ei mangil mo? A taksita eina ditna a bang mo ni zei?” (Selah)

¹⁰Hatuka, “Hava ha kei riat nok sika keng; tenchu ansangkhit a changkut kum ngai ha retit ka ti.”

¹¹Pathian sintho ngai ha ril ka tia; tianlaia boidong sin nei tho ngai retit ka ti.

¹²Nei tho ngai dora mandon ka tia, nei tho ngai um tho ka ting, ka ti na.

¹³O Puma na lampui chu mun anthianga a oma. Koini Pathian anga Pathian alian tumo a om?

¹⁴Nang chu boidong sin atho chachak Pathian na ni na, mitin kom nei ratzia na manriata.

¹⁵Na ban le na mi ngai na mazoka, Jakob le Joseph a nai ngai ha. (Selah)

¹⁶Ti ngaiin ana mu u O Pathian; ti ngaiin ana mu u na ankhek u, tinthuk ngai um annok u chachak.

¹⁷Ansumin ti aleia; anvanin khuanri le rasa aneia, na thal ngai maton tiang nuk tiang an leka.

¹⁸Na khuanri ha kellaihera a oma; khuanlek ngaiin ramual hi a ela, phil hi annoka annik.

¹⁹Na lampui chu tipuiliana a oma; na lampui tiliana a oma, na ke nuk amu asanokam.

²⁰Na mi ngai chu bera rual anga, Mosi le Aron a kutin a maruai.