Read Ranglong SAM 78 Bible Online

SAM 78 - Ranglong bible

SAM 78

¹Asafa La hian O ka mi ngai, kei na manchu rangai u ro; ka mura chong rangai u ro.

²Ankhina le ka mur malong ka ti, tianlaia chongril ha rasua ka ti.

³Hava ngai ha ka kuarin ariata; ka malungin um ariat, na pa ngaiin um ana ril.

⁴Hava ngai ha a nai u ngai kom thup no ma ni; rual athar athui rang ngai kom, PUMA anpakna chong le, ei rat le boidong sin ei tho ha ril inti.

⁵Jakob ngai koma a chong manriat a mandeta; Israel ngai kom dan a sina. Hava ngai ha a chipui ngai kom chongpek anga apek; amani han a nai u ngai kom hava chong ngai ha anriat ranga.

⁶Thuiathar athui rang, naipang a hong anzir rang amanim ei riat thei u na rang hava ngai ha a nai u ngai ei rila ei manlon tir theina rang.

⁷Hatuka, ei iam u na Pathiana ei anbetok thei u na rang hatuka, ei tho ngai mangil u no ni tenchu a chongpek tel unti.

⁸A chipui u ngai anga ni u no ni; mi he tel lui le a sel, a malung u Pathian tel lui; a ratha u Pathian iamrua ni lui.

⁹Ephraim mi ngai ral raliang le saili le anthuam u nam; andui nikhua anuk a kir ret.

¹⁰Pathian chongtin zi u maka, a dana om zot u mak.

¹¹Ei tho ngai a mangil u na, boidong sin ei tho ngai ham.

¹²A chipui ngai mit muna boidong sin atho na; Aigupta rama Zoan phai han.

¹³Tipuilian ha asata amani chu aman se, ti ha bang anga a manding.

¹⁴Suna ansumin aruai, zana moi ra-angin aruaia.

¹⁵Philchara lung alian ngai aphela, tipui alian anga ti tampa a peka.

¹⁶Lungpui ata tidung arasua, ti ha tidungpui anga a manluang.

¹⁷Hanum a masial tit u na, philchara ansangkhit a chunga a sel u na.

¹⁸Arolasia anmongna ranga ei sak zot u a zonga, a malunga Pathian a mansin u na.

¹⁹Pathian adui chong aril u na, ati u, “Philchara Pathianin dokang a mansuk thei mo?

²⁰Lungpui a razika ti a rasua; tidung ngai aliam, bu ham apek len thei mo? A mi ngai rang me a mansuk thei mo?” a ti u.

²¹Hatuka PUMAN ariata atakasi; Jakob ngai chunga moi ahonga chuang, Israel ngai chunga taksitna honga suak.

²²Pathian iam u maka, a sandam nam ei iam u nok sika.

²³Tenchu chunga anvan chong apeka, anvan suakkhar a malong pe na.

²⁴Ei sak u rang manna a masula, anvan bu ha ei pek.

²⁵Miring ngaiin vanpalai ngai bu anek u na, akhopna khopa bu ahong peka.

²⁶Sualam thinthi anvan ata a mansema; ei tho theina le sim thinthi a ruaia.

²⁷Me ha rua anga a manhonga philvut dor, va zuang thei ti kola bali ramal dor.

²⁸Ei riak u na muna ahong masul pe na, ei om u na chubuk kola.

²⁹Hatuka anek u na akhop u, ei sak zot u ha a pek.

³⁰Ei sak zot u la bang maka, a baia a bu muam u ala om.

³¹Hava lai tak han Pathian amani chunga atakasi; amani kara asa ranak anei senkhat athata.

³²Havantin ngal han asanok ala tho bang u na, boidong sin ei tho ngai ha iam u maka.

³³Hasik han a damsung nikhua ite niluia a manhek pe, a damsung kum anchirua chiana a manhek pe.

³⁴Amani athat kip ama ha arok u chachak, akir ret u na zinga Pathian arok ret u na.

³⁵Pathian ha a lungpui u ei ni, Pathian chungkhita ha an ratanpu ti anriat u chachak.

³⁶Tenchu ama ha amur le a manpak papei u na, amalei u le milak atho u chachak.

³⁷A malung u ama tak chunga dik maka, a chongtin u nam a iamrua ni u mak.

³⁸Tenchu ama chu lungkham le abit ei ni sika, ei dik u nokna chu a maduala; amani chu masiat maka. Voi hozetmo ataksitna chu among reta, ataksitna chu aloma masum zot maka.

³⁹Taksa duai keng ti a riattita, thinthi hong kir ret lui rang ang hi.

⁴⁰Philchara voi itukmo ei sel u, ramachara ama chu a malung a manhang chian u na.

⁴¹Nuk anhoi u na Pathian a mansin ret u na, Israel ngai mi anthiang a mannuar u chachaka.

⁴²A kut ha retit u maka, adui ngai ata ei mazok nikhua re pial u chachak mak.

⁴³Hantina Aigupta rama ei mandangna asiaka, Zoan phaia boidong sin ham asiaka.

⁴⁴A tipui u thisena a manchanga, tidung thisena a manchanga ne thei u mak.

⁴⁵A kar u na mathui atira hava ngai han asaka; uichok atira hava han a masiata.

⁴⁶A anna u ngai ha khai apek, asintho u ngai mara ha khaisor apek.

⁴⁷A gerep rang u ha arialin adenga, a theipui kung u ngai arialin a masiata.

⁴⁸A me vai u ngai arial apeka, a me rual u ngai machekin adenga.

⁴⁹A taksitna amani chunga achul, taksitna, malung dikluina, boidongna siatna kuitir rual ngai ha.

⁵⁰A taksitna rang lampui asin pe na; thina ata mazok maka, tenchu rikhua kom amani ha apek.

⁵¹Aiguptana arapa dora athata, miring mara mansa Hama puanina.

⁵²Tenchu me rual anga ami ngai ahong ruai, philchara bera anga ahong maruai.

⁵³Azok hiaia ahong maruaia; hasik han achi u mak, tenchu tipuilian adui ngai chu atan.

⁵⁴Tenchu, mun anthiang rikung ten ahong ruai, ha tang ram a chang kutin ei lak.

⁵⁵Nam dora a makung u ata a nota; a nai ei lua u ranga apek, Israel nam ngai ha a ina a mantung.

⁵⁶Tenchu Pathian a mansin u na; ansangkhit a duia a sel u, a dan manriat ngai zi u maka.

⁵⁷A pa u ngai anga, tel u maka, iam u maka, thal ankhir lui anga akoi u.

⁵⁸A mun ansangam ama tak a mansi pe u na, aramil biak u le ama manar a mansia u na.

⁵⁹Pathianin hava ngai ha ariata a takasi Israel ngai chu achan a matir.

⁶⁰Silona puanin ha amak, ha chubuk miring kara ei manding ha.

⁶¹Pathian bom ranak ha selkeia a manchoi, ei anlianna ha a dui ngai kuta apek.

⁶²A mi ngai khendai koma apeka, ei lua ranga atakasi zei.

⁶³Moiin ruathar ngai ahala, a nungak u ngaiin anomna la ngal don u lai mak

⁶⁴A chaizung u ngai chu khendai le akiak u na, a arong u ngai chap thei u mak.

⁶⁵Hava lai tak han PUMA chu mi insang alak anga insang alaka, ranak anei uain sika ankhek anga.

⁶⁶Ama adui ngai chu azema amakhira, umor mualphui ansakna na a man se.

⁶⁷Hatuka Joseph a puanina akhai, Ephraim nam ha athang mak.

⁶⁸Tenchu, Juda nam ha athanga, Zion mual ei madit ha.

⁶⁹A in anthiang chu anvan ansang anga ei sin, leilung anga umora ranga a mandet.

⁷⁰A suak David athanga, bera rung ata arasua na.

⁷¹Berapui a te ruai azi ata arasua na, Jakob ngai le ei athang Israel ngai arung ranga.

⁷²Hatuka, David han iamrua le malung anthianga a maruaia, kut athiam le amani a maruai.