Read Ranglong SAM 80 Bible Online

SAM 80 - Ranglong bible

SAM 80

¹La ruaipu rang: Asafa Anpakna La O Israel ngai arungpu, bera rual anga Joseph ngai aruaipu. Na kuar sung ro. Nang cherubim ngai kong kara ansut hong el ro.

²Ephraim, Benjamin le Manase matona na ranak rasua tan hong tan na hong mazok ro.

³Na makhir ret ro, O Pathian, na mel koini chunga man el ro, koini nei zok theina rang.

⁴O PUMA, Pathian Athotheikiar, ituk asot ngal mo na mi ngai borzong tak chunga na tak ei si rang?

⁵Amani chu mit rathi bu na manneka, kheng abita mit rathi na manneka.

⁶Nangin koini kola mi ngai ankhalna ranga nana sina, ana dui ngai anni u chachak.

⁷Na mazok ro O Pathian Athotheikiar; koini chunga na mai hong man el ro, nei zok theina rang.

⁸Aigupta ata gerep rang na hong choia, namtin na rasuana na phuna.

⁹Amun ranga na rathiala, razung aphana ram ha abita.

¹⁰Mual ngai chu aralimin athuama a oma, Sidar thing alian ngai um abak le.

¹¹Abakpui um tipuilian tenpei ava suaka, atuai ngai um tipui tenpei.

¹²Ichangamo abang nei masim? Anloi ngaiin gerep mara rut unti;

¹³rama mangalin amasiata, rama me ngaiin um asak u chachak.

¹⁴Koini kom hong kir ret ro O Pathian Athotheikiar! Anvan ata thuai tiang hong en ta! Hiva gerep rang hi rung ro.

¹⁵A kung na chang kutin ei ling, abak na rang nei mankhir lehin.

¹⁶Na rang ha antan zei, Moia anhal zei, chunngo nei thonana na raldui anpei chachak.

¹⁷Na kut ha na chang tianga mi achunga om rase, Miring sapa na ranga nei mathui.

¹⁸Hatuka nang ata ankhai no ma ni, na manhar ro na raming pai inti.

¹⁹Na mazok ro O PUMA, Pathian athotheikiar; koini chunga na mai man el ro, sandama nei om theina rang.