Read Ranglong SAM 88 Bible Online

SAM 88 - Ranglong bible

SAM 88

¹Kora mi ngai Anpakna La O PUMA, asun azana na makunga sanna ka na zong chachaka.

²Ka borzongna hi na lei rangai pe tan; na kom hong tung rase!

³Ka damsung nun hi lunghangna bita; ka damsung nun um thina (Seol) ke ka nai riam.

⁴Khurkuruanga achum ngai bila anchel ang ke ka ni zei.

⁵Ral anthat sua thana anzal anga, athi bila anpei ke ka ni.

⁶Khurkuruang anthukpa, alel azinga ke ana manzal u zei.

⁷Na tak sitnan, ti duar ansokin ei makhu ang ke, ei na makhu ani zei. (Selah)

⁸Ka mi riat ngai chu alapana na manoma, a rang u na antir aruaia ke, nei na sin ka ni zei. A sunga kan khuma, suak thei lai making.

⁹Antak nan ka mit a manduala, O PUMA, a nikhuan tina ka na paia ka kut um na matona ka phar chachak.

¹⁰Athi sua ngai rang boidong sin mo nei tho rang athi ngaiin anthuia ei na manpak u rang mo? (Selah)

¹¹Na lungkhamna thana anril mo, aiamrua nei ni zia thina muna mo anriata ei om rang?

¹²Na boidong sintho chu azing kara anriat ni mo? Nei singna chu anngil ramam anriata om ni mo?

¹³O PUMA, koiin chu na pai ka ting, ka borzong nan zinga na lei ot inti.

¹⁴PUMA ichangamo ka nun hi nei mathan? Ichangamo na mai nei na thup pe?

¹⁵Naipang te ka ni lai ata antak ka tiara, ka thi vivit chachaka, anchirua pangai ka tiara ka mulin ana lim chachaka.

¹⁶Na taksitnan ana makhuna; anchi nei ruai nan chu ana that zei.

¹⁷Hava ngai han, sun khat ti anga ana rila, ana hual tit u.

¹⁸Lungkham ana mupu le ka lom andit ngai chu alapana na re na, azing le mal ka ni zei.