Read Ranglong SAM 89 Bible Online

SAM 89 - Ranglong bible

SAM 89

¹Ezra mi Ethana La PUMA ei anzikna rui chu taituana, la na tho ka ting; ka murin iamrua ei ni zia akhuk tina manriat ka ting.

²Ei anzikna chu, taituana ansuka om inti; iamrua nei ni zia chu anvana mandet na ti.

³Ka mi thang kom han chong ka tin, ka suak David a kom khomak kan sama.

⁴Na chi ngai chu taituan ranga mandet ka ting, na reng chomphang um akhuk tina mansuk ka ting na ti na. (Selah)

⁵O PUMA, vana son boidong sintho hi manpak untia, mi anthiang ngai ankhomna nam iamrua nei ni na manpak unti.

⁶Anvan adum so PUMA le ankhi thei rang tu mo? Van mi ngai bila Puma apha tumo a om?

⁷Mi anthiang ngai anchunna na anchi na ruai a kol tanga mi dora ranga anchi rua nei ni.

⁸O PUMA, sipai ngai Pathian, nang na anga arat om mak; Alompeia aiamrua nei ni.

⁹Nang chu tilian sanga borai chunga rui na ril; a ti duar ansok lai chu

¹⁰Nangin kachai Rahab chu ral anthat anga na set; ana dui ngai chu na ban arat le na manchen.

¹¹Van hi na ta, phil um na ta ei ni, ramual le asunga a om dora hi nang nei manding ei ni.

¹²Sim le mar chu nang nei sin, Tabor le Hermon chu na raming sika raisan la tho u chachak.

¹³Nang chu sin atho thei ban na dona, na kut chu arata na chang kut chu anlianga oma.

¹⁴Anzekna le ruirilna dik chu na reng chomphang ei ansutna ani na; ei anzikna le chongtak chu na matona ase chachak;

¹⁵La na ana pham ngai chu itukmo arai ei san u chachak, na lungkhamna ra-anga a om ngai!

¹⁶Na sika sun sot arai asan u, hatuka nei sa sika ana manpak u.

¹⁷Nangin ratna lian tak nana peka; na lungkhama zuina nana peka.

¹⁸Nangin O PUMA, koini rang pho na thanga; nang, Israel Pathian anthiangin, reng nana pek.

¹⁹Hava lai han na mi anthiang kom anralna chong na peka, “Mi rat khat kom sanna ka peka; reng chomphang ha mi bila keia thang kom ka pek.

²⁰Ka suak David ha reng ka manchanga sariak anthiang ka manthina.

²¹Ka kut hi ama kom adeta om inti, ka banin ama chu manrat inti.

²²A dui ngaiin ama chu ngam no ni, mi saluiin mandok no ni.

²³Adui ngai amatona zema maluai ka ting, an mumak ngai pangsep ka ting.

²⁴A kom iamrua kei nina le, kei anzikna chu, om inti. Ka raming sika a raki anliangam om inti.

²⁵A kut chu tipuiliana manson ka ti na, a chang kut chu tipuia.

²⁶Aman, nang chu ka pa ka Pathian, ka sandamna lungpui na ni ati na, na pai inti.

²⁷Hatuka, ama chu nai rapa pasal sin ka ting phila reng ngai bila ansangkhita sin ka ting.

²⁸Kei anzikna chu taituana ranga vong pe rap ka ti. a koma ka chongtin adeta om inti.

²⁹Anchi ngai chu umor taituana manom ka ti, a reng chomphang chu van a om tenpei manom ka ting.

³⁰“Ten a nai ngaiin ka dan amak u ten, ka chongpek anga a om u nok ten,

³¹ka chongtin amachaia ka chongpek avong sadim u nok ten,

³²Ei machaina ngai chu sunrol le va chei ka tinga, ei masial sika azem ranga va chei ka ting.

³³Tenchu, kei anzikna chu akom ata la pe kiar no ning iamrua kei nina chu milaka ei chang rang chu phal no ning.

³⁴Ka chongtin chu masiat no ning, ka mura chong asuak chu man tei no ning.

³⁵“Voikhat kei anthiangna le khomak kan sama, David akom milak tho no ning.

³⁶A khuk chu taituana om intia a reng chomphang um ka makunga ani anga om inti.

³⁷Tha anga taituana ranga adeta om inti ha anvana ariat pui anga.

³⁸Nangin chu na mathana zot mak che na nei manthi chunga na takasina.

³⁹Na suak chongtin chu na matira, na reng lukhu chu phila pei anga na mannuaia.

⁴⁰A rapal dora na maluai pe na, ei anhualna rakul chu, na masiat pe na.

⁴¹Lampuia ase takin aneinun alak pe chachaka, akola mi ngaiin asiat aril pe na.

⁴²Ama anduipui ngai chang kut chu na manpaka; araldui ngai dora chu arai na mansan pe na.

⁴³Ani, a khendai chu na pir pe na, ama chu anduina na ake sir mandet pe mak che na.

⁴⁴A ra-ang chu na mandai pe na, a reng chomphang chu phila na pei pe.

⁴⁵A vanglai hun chu na mantom pe na, ama chu mualphui ansakna le na makhuna.

⁴⁶“O PUMA, umora nei anthup chian rang mo? Ituktenmo na taksitna chu moi anga nei chuang rang?

⁴⁷O, ka hun ei bong rang hi retit tan la; miring nai ngai hi itena sin lai mak che hi le!

⁴⁸I ang miring mo thi ni mel muluia adam rang? Seol kut ata anun asan rang (Selah).

⁴⁹PUMA, tianlai na lungkhamna David a koma khomak ansama nei tin ha. Hontiang ei om ani zei?

⁵⁰PUMA na suak ngai ei dem u na retit tan la, nam arat ngai rilsiatna ka malunga kei tiar chachak ha.

⁵¹O PUMA, nang anan duipui ngai rilsiatna, na sariak manthi ngai ke nuk rilsiatna ha.

⁵²PUMA chu taituana anpaka om rase! Amen! Amen!