Read Ranglong SAM 9 Bible Online

SAM 9 - Ranglong bible

SAM 9

¹La ruaipu rang: Davida Anpakna La PUMA koma han ka malung dora le raisan chong ril ka tia; boidong sin nei tho dora ril ka ti.

²Nanga han kei phama ka raisan inti. O, nang Chungnungkhit, na raming anpaka la tho ka ti.

³Ka raldui ngai ei rot u le; na matona anba u na, anpei u.

⁴Koi ka ranga ngal le ka ruia hin nangin nana sana, na reng chomphanga ansuta dik taka rui na rila.

⁵Namtin chunngo na thona, mi salui ngai na pei bianga; a raming u chu kumkhuana rang na pei pe na.

⁶Adui ngai chu aram biang u na, kumkhuana rang ite don luia om u; ram nei masiat sua ngai chu, amani riattitna raming tenpei anpei zei.

⁷PUMA chu kumkhuana rang renga ansuta; a reng chomphang chu ruirilna ranga a mansuk zei.

⁸Aman chu ramual hi adik taka ruiril inti; ami mandang abuia mitin rui chu ril inti.

⁹Hava suale PUMA chu anphenenga om ngai ranga rakul ansang lei ni inti. Rathatak laia han rakul ansang ni inti.

¹⁰Hatuka na raming ariat ngaiin na iam inti; nangin chu, PUMA, nang anan rok ngai chu mangai mak che na.

¹¹PUMA, Zion a om chu, anpak la tho u ro! Mi bila a sintho ngai chu ril u ro!

¹²Thisen ansuak athun chachakpu han ama chu ariat tita; anriang ngai chapna mangil ngai mak.

¹³O PUMA, lungkham na mu ro! Thina suakkhar ata anan zokpu, anan mumak ngai sika ka rathata na ngai hi enta.

¹⁴Nang anpakna ngai dora chu kei manriat theina rang; Zion nainupang suakkhar ngaia han, nei na sandamnana hin ka raisan inti.

¹⁵Namtin chu a khur sina han anning u na; maruka a len pha u na han amani ke len anoka.

¹⁶PUMA chu hong anpuanga, rui a rila; mi salui chu ama kut suak ngeta han anok chachak. (Selah)

¹⁷O PUMA, anthui ta; miring maiin na ngam no rase, namtin Pathian anngil ngai dora se unti.

¹⁸Antak ngai chu anngil banga om u lai no ni; anriang ngai sabeina kumkhuana chu anpei no ni.

¹⁹O PUMA, anthui ta; miring maiin na ngam no rase! Namtin chu na mitmuna hin rui anrila om rase.

²⁰O PUMA, amani kom anchina manmu ro; namtinin miring mai ei ni ti anre u rase. (Selah)