Read Ranglong SAM 92 Bible Online

SAM 92 - Ranglong bible

SAM 92

¹PUMA na koma raisanna antung hi ahui ba, nang anpakna la tho Ansang khit Pathian,

²azing tina na lungkham chuai lui aril hanuk nei dikna azan tina aril,

³Atum theilia le risom nei, pirkhuang le tingtang rasa ning ananbui thei le.

⁴Na sinthon O PUMA, ka rai a mansan; na sintho sika raisanna la tho ka ti.

⁵PUMA na sintho ngai alian ba! Na mandon um anthuk ba!

⁶Amon chu hia hi rethei mak; achangin um rethei mak:

⁷Mi salui ngai chiak anga ancher u nam, misiat ngai dora anson u nam; tenchu siat biang unti,

⁸Asik chu umora, PUMA, nang chu ansangkhit na ni.

⁹Na riata na raldui ngai chu thi unti, hatuka mi salui ngai dora andok unti.

¹⁰Ram serat chal anga ranak nana man neia; raisanna le borsang nana mantunga.

¹¹Ka raldui ngai ei andok ka mitin amu zeia hatuka mi salui ngai ei ankhek ka riat zei.

¹²Mi sa ngai chu letum thing anga anbur unti; Lebanon tanga thing anga anson unti.

¹³PUMA ina thing anling ang ni unti, Pathian biakina anson tutur unti,

¹⁴Ataram anra tit anga aring tita avang tit anga.

¹⁵Hintin hin PUMA chu anzik atia anlang, ana rungpu kom diknokna ngal om mak.