Read Ranglong SAM 96 Bible Online

SAM 96 - Ranglong bible

SAM 96

¹O, PUMA anpaka la thar tho u tan la! Leilung alua ngai dora! PUMA anpaka la tho u ro!

²PUMA anpaka la thona! A raming manpak u tan la; nikhuan tin a sandamna chong chu manthei u ro.

³Namtin koma ei lianzia ril u tan la, mitin bila boidong sin ei tho chu ril u ro.

⁴PUMA chu alian ke, anpak sabak rua ke; Pathian atatei neka anchi rua ke.

⁵Mipui ngai Pathian ngai chu miramilte ngai ke, PUMA hi chu anvan ngai so ei sin ke.

⁶Anpakna le anlianna a makunga a om u na; ratna le satna chu amun anthianga a om u.

⁷Mitin chitin ngai o, PUMA chu pe u tan la; PUMA chu anlianna le ratna pe u ro.

⁸PUMA chu a raming anlianna pe u tan la; neinun adar rua choia a biakin zahual sung kholaia hong u ro.

⁹O, anthiang asana le anlianga PUMA amok u tan la; leilung alua ngai dora, a makunga anchun annika om u rei!

¹⁰Namtin bila han, “PUMA chu renga ansut, ti u ro! ramual um ei annik thei nokna ranga, andeta a om ke; Ama han mi mandangna buia mitin rui chu ril intia.”

¹¹Anvan ngai chu aphama om sela, phil um raisan taka om rase! Tipuilian le asunga a om ngai dora hi rasa don u rase;

¹²ram le asunga a om ngai dora aphama om rase! Hatik han chu ram thuaia thing ngai dora hi raisana la tho unti,

¹³PUMA makunga han; ama chu hong inti. Phila rui aril rang ahong rang ke: Ramual hi adika rui ril pe intia, mitin ngai chu chongtak le rui ril pe inti.