Read Ranglong SAM 98 Bible Online

SAM 98 - Ranglong bible

SAM 98

¹O, PUMA anpaka la thar tho u ro; boidong sinpa ngai atho ani na, achang kut le aban anthiangin ama ranga sandamna asin pe.

²PUMAN chu sandamna ha a manriata; ei satna chu namtin mit muna han anthiang phita a manlanga.

³Israel sung ngai chunga ei satzia le iamrua ei ni zia a riattita, kolkila mi dora ninum na Pathian sandamna chu amu u na.

⁴Leilung alua ngai dora. PUMA manpaka ankhek u ro; ankhek u tan la raisan la tho u ro!

⁵Tingtang le PUMA anpaka la tho u ro! Tingtang le anpakna la rahu le!

⁶Totorot dora le se raki theilia maring le. Rengkhit PUMA matona han raisan sabaka akhek u ro.

⁷Tipuilian le asunga om doran rahu pe sabak rase; ramual le asunga a om ngaiin.

⁸Tidungpui ngaiin maza aben sela; mual ngaiin raisan la tho rase,

⁹PUMA matona han phil rui aril ranga ahong rang ani na. Ramual hi asa dima rui hong zek pe intia, a mimandang abuia mitin rui la hong ril inti.