Read Ranglong MATHAIIN 10 Bible Online

MATHAIIN 10 - Ranglong bible

MATHAIIN 10

¹Hatuka a zolai somleianni ha a kom apai, ratha annim ngai chunga ningneina apeka hava ngai ei khaia hanuk rikhua le ana tin ei mandam thei u na rang.

²Ha somleianni ngai raming hiva ngai hi Simon Pitor hatuka a parual Andria, Jebedi a sapa Jakob le a parual Johon.

³Philip, le Bartholomai Thoma le lei ansuang Mathai Alphai a naipasal;

⁴Jakob le Thaddai; Kanan Simon hatuka Juda Iskariot ama han anmumak ngai kuta ei pek.

⁵Hiva somleianni hi Isuan ei tira hangai ha chong ei pek.

⁶“Jentail ngai lampuia se u no ro hatuka Samari bung lut u no ro hanekten Israel khuka beran pei ngai kom se u ro.

⁷Hatuka nei se u na tina hiva chong hi ril u ro, ‘Vanram anai zei!’ atia.

⁸Ana ngai mandam u ro athi ngai mathui u ro aphar ngai manthiang u ro kachai ngai khai u ro. Man abui a nei man u man abui dena pe u ro.

⁹Na kong vong u rang.

¹⁰Rangkachak, sumru, dangka siakna rang marsa, zani anni, kekok, raimol, hava ngai dora mansuk u no ro. Asik chu sin atho ngai chu asak anang.

¹¹“Hatuka khopui, khuana, ina nei lut u na ansuk ual arok u ro mun ateia na se u man hava han om u ro.

¹²Hatuka a ina na lut u tik le raisan chong ril u ro.

¹³Hava han nei tung u na ha arua aniten nei ni u na ha ama chunga chul rase. Arua ani nok ten na phukdai u na ha na kom u den hong kir rase.

¹⁴Hatuka nangni ana pom u nok tak chu hanuk na chong u anngai nok tak chu ha in le ha khua ata na suak u tik na ke philvut u ngai athing u ro.

¹⁵Ataka kei na ti ni u zei ruiril nikhuana ha khua ei tong rang chu Sodom le Gomora ram ei tong azang ual!

¹⁶“Enro! Ngelang laia bera anga, hantin han kei na tir ani u zei hasik han marul anga hiana vasu anga annuai u ro.

¹⁷Tenchu mi ngai ata anrenga om u ro asik chu ruiril muna na pe untia anchunna ina na zem unti.

¹⁸Hava baka ka sika ram ulian le reng ngai makunga amani le Jentail ngai kom anriat ranga na ruai unti.

¹⁹Tenchu min ana sur u tik hatika nangnin hontinmo, imo aril rang atia andon u no ro. Asik chu nei ril u rang tak ha ahun taka anpe inti.

²⁰Asik chu nangni ni mak aril rang na Pa u a Ratha, na sungril u na a chong aman ril inti.

²¹“Hatuka a parualin a parual, a pan a nai ha athat ranga pe inti hatuka nai ngaiin nupa dui intia manthat inti.

²²Hatuka ka raming sika mi doran na mumak unti, tenchu ahekten peia angirtit tak chu zok inti.

²³Hatuka khokhata ana not u le khua teia rot u ro. Ataka kei na ti ni u zei Israel khua dora na na sin u hek no ni Miring Sapa a hong nok maseng.

²⁴“Anchu anchupu neka lian mak hatuka suak suak puma neka lian mak.

²⁵Anchu, anchupu dor suak a puma dor aniten ahun, in puma ha Beelzebul ati u ten a in komi ngai vang chu haneka imo ei ti u nok rang!

²⁶“Hasik han hangai ha achi u no ro asik chu anthup om mak anlang nok rang. Maruk ite om mak ariat nok rang.

²⁷Azing kara keina ril u ha, hava ha avara ril u ro, hatuka na kuar kunga nei rangai u ha hava ha in chunga ril u ro.

²⁸Hatuka taksa that theia ratha that thei lui ngai ha chu achi u no ro, tenchu taksa le ratha aninin anphenengna muna anan siat thei hava lam ha chu achi u ro.

²⁹Asara va anni poisa khata anzuar no ni mo? Na pa u phalna nok aniten hangai ha angkhat ngal phila chul mak.

³⁰Tenchu na lu u na sam um antel zit keng.

³¹Hasik han achi u no ro, asara va tampa neka na lian u.

³²“Miring makunga ana pom tak chu kom ka Pa vana mi makunga ama ha pom ka ti.

³³Tenchu mi ngai makunga ana pom nok tak chu kom ka Pa vana mi makunga pom no ning.

³⁴“Phil chunga koi hi phukdai a peka hong atia na malung masui u no ro. Phukdai a peka hong makung, tenchu khendai a pek ke kei hong.

³⁵Asik chu a pa le a nai a nu le a nainupang, hatuka a tarpi le a muinu ansen ranga ahong ke kei ni.

³⁶Hatuka a u, a nanai ngai hake miring ei anmumak rang.

³⁷“A nu mo a pa mo ka neka andit tak chu ka mi ani rua ni mak. Hatuka a naipasal mo a nainupang mo koi ei na dit neka andit tak chu ka mi ani rua ni mak.

³⁸Hanuk aninga a kros anputa ka nuk zi lui tak chu ka mi ani rua ni mak.

³⁹A nuk arung tak chu machan inti, hatuka ka sika a nuk anchan tak chu ama chu zok inti.

⁴⁰“Ana pom u tak chu koi ke ei na pom. Koi ana pom tak chu ana tirpu ke ei pom.

⁴¹Deari ha deari tia a pom takin deari phamman man inti. Hatuka minzik ha minzik atia apom ten anzik phamman man inti.

⁴²Hanuk hi asin ngai bila angkhat pei ruaisi atia ti dai khuri khat annek chu phamman man inti.Ataka kei na ti ni u zei, a phamman machan no ni.”